P4.8 million nga proyekto sa karsada giturn-over sa lungsod sa Ronda

CEBU, Philippines —  Tulo ka community infrastructure projects nga mokantidad og kapin P4.8 milyon ang nahuman ug pormal nang giturn-over ngadto sa tulo ka barangay sa lungsod sa Ronda. Ubos kini sa KALAHI-CIDSS Kapangyarihan at Kaunlaran–Community-Driven Development (KKB-CDD) program sa Department of Social Welfare and Development (DSWD)-7. Ang mga proyekto nga pagsemento sa karsada giturn-over niadtong Hulyo sa Barangay Vive, Libo-o ug Cansayahon, isip kabahin sa lima ka aprobado nga KKB-CDD sub-projects nga gipatuman sa lungsod.

Lakip sa nahuman nga proyekto mao ang P1.56-milyon nga road concreting project sa Barangay Vive, P1.59-milyon sa Barangay Libo-o ug P1.66-milyon nga proyekto sa Barangay Cansayahon.

Matud sa DSWD-7, tumong sa mga proyekto nga mapaayo ang accessibility ug mobility sa mga residente pinaagi sa mas luwas ug kasaligan nga mga karsada.

Makatabang usab kini sa mas hapsay nga pagdala sa mga produktong pang-agrikultura, pagpa-access sa mga batakang serbisyo ug pagpalig-on sa emergency response, ilabina panahon sa kalamidad. Ang mga proyekto nahuman pinaagi sa paningkamot sa mga community volunteers nga migahin og kapin usa ka bulan sa pagpatuman ug pagtukod sa mga sub-projects.

Matud sa DSWD-7, gipakita sa malampusong pagkompleto sa mga proyekto ang pagka-epektibo sa Community-Driven Development (CDD) approach diin ang mga komunidad mismo ang motino, magplano, mopatuman ug modumala sa mga proyekto nga motubag sa ilang nag-unang panginahanglan.