EDITORYAL - Lantip nga tubag ni Gibo

Mubo, walay daghang pasumbingay apan lantip  kaayo ang tubag ni Defense Secretary Gibo Teodoro sa paghulagway sa mga Pilipinong nagdumili sa pagdawat ug pag-ila sa kamandoan kaniadto ni anhing presidente Benigno “P.Noy” Aquino III nga pagatawgong West Philippine Sea ang kadagatan sa kasadpang bahin sa Pilipinas nga nag-atubang sa South China Sea.

Ang tubag ni Teodoro, kana lang daang dili dawaton ug dili ilhon ang kamandoan kaniadto sa nitaliwang presidente, sulod kaayo na sa standards sa Department of National Defense para tawgon ang usa ka Pilipino nga usa ka pro-China.

Kun pro-China gani sa isyu bahin sa WPS, bisan unsa pay rason nganong dili dawaton ug ilhon ang WPS nga WPS, madudahan gyud nga traydor o maluibon sa Pilipinas.

Isip usa ka Pilipino,  gipaabot nga unahon kung unsay interes ug ikaayo sa Pilipinas kun ang buot mohagit niiini usa ka langyaw o banyaga.

Mas samut nga angay mobarug para sa Pilipinas kun kini nagkahulogan na nga mahikawan ang mosunod nga mga henerasyong mga Pilipino kun mailog sa China ang WPS.

Ang gibuhiang pamahayag ni Teodoro kagahapon, Agosto 7, maoy tubag niya sa paghagit sa iya ni Vice President Sara Duterte nga hinganlan ang mga public officials nga gusto niyang pa-resign non tungod kay sila mga pro-China.

Ubos sa Administrative Order No. 29, nga giisyu ni P.Noy niadtong tuig 2012, pormal nga pagatawgon sa Pilipinas ang kadagatan sa kasadpang bahin sa Pilipinas nga West Philippine Sea, gimando sab niya tanang ahensiya, departamento ug mga kawani sa gobiyerno nga sagupon ang maong pangalan sa tanang opisyal nga mga dokumento sa gobiyerno.

Walay igong rason para ni bisan kinsang opisyal sa gobiyerno nga dili kini ilhon respetuhon tungod kay gisagop kini sa gobiyerno ug sa kinabag-ang mga Pilipino.

Usa pa ana, seguridad sa pagkaon ug kaugmaon sa mosunod nga mga henerasyong Pilipino ang mabulahan niini ug dili para maoy mabulahan lang mao ang China.

Sa pagkakaron, giduso na sa gobiyerno sa Pilipinas ang nautical charts sa Scarborough Shoal ug Panatag Shoal nga gitawag sab og Bajo de Masinloc nga karon padayung gibabagan sa China gamit ang ilang mga barko ug gihikawan ang mga mananagat nga Pilipino.