Suspect kay Perry Mariano, driver arestado
MANILA, Philippines — Nasakote ng mga awtoridad ang suspect sa pagpatay sa negosyanteng si Perry Mariano at driver nito sa Quezon City noong Abril ng taong ito sa isinagawang buy-bust operation sa Kapatagan, Lanao del Norte, ayon sa opisyal kahapon.
Inianunsyo ni Quezon City Police District (QCPD) Director p/Brig. Gen. Randy Glenn Silvio ang pagkakaaresto sa suspect na kinilala nito sa alyas na Kidong, 38-anyos, residente ng Brgy.Poblacion, Kapatagan, Lanao del Norte.
Sinabi ni Silvio na si Kidong ay nasakote ng pinagsanib na elemento ng mga operatiba ng pulisya sa buy bust operation bandang ala-1:45 ng hapon noong Huwebes (Agosto 6) sa Brgy. Poblacion, Kapatagan ng lalawigang ito.
Narekober mula sa suspect ang nasa 1.30 gramo ng shabu na nagkakahalaga ng P8,840.00. Ang suspect ay pansamantalang isinailalim sa kustodya ng Kapatagan Municipal Police Station (MPS) para sa kaukulang disposisyon sa kaso nitong paglabag sa RA 9165.
Noong Hulyo 13,2026 ay nagsampa ang QCPD ng dalawang counts ng murder laban sa mga sangkot sa pagpatay kay Mariano at driver nito na tinambangan at pinagbabaril sa Quezon City noong Abril 28, 2026.
Sa tala si Kidong ay may dati ng kasong paglabag sa Republic Act No. 11235 o ang Motorcycle Crime Prevention act at ang Republic Act No.9165 o ang Comprehensive Dangerous Drugs Act of 2002.
“The QCPD is closely coordinating with the concerned police units in Lanao del Norte to facilitate the necessary legal procedures and ensure the suspect’s accountability in connection with the double murder case,” saad ni Silvio.
- Latest
