Waterworld nangayo og pasaylo sa Talisay

CEBU, Philippines — Nangayo og pasaylo ang Waterworld Cebu Philippines Corporation ngadto kang Talisay City Mayor Gerald Anthony "Samsam" Gullas, Jr. lakip sa kagamhanan ug mga residente sa siyudad human nalambigit ang gi-hire nilang garbage hauling contractor sa giingong ilegal nga paglabay og basura diha sa Barangay Jaclupan. Nangangkon ang kompaniya nga wala sila magsugo o nagtugot sa bisan unsang ilegal nga paglabay sa basura ug giingong nakahibalo lang sila sa maong hitabo pinaagi sa mga report nga nigawas sa publiko.

Base sa opisyal nga pamahayag nga giluwatan niadtong Biyernes, ang Waterworld nipadayag sa ilang pagpangayo og pasaylo ug kasagmuyo sa nahitabong insidente ug sa kabalaka nga nahatag niini ngadto sa mga Talisaynon. Gipadayag sa Waterworld nga uban sa Dakbayan sa Talisay nibarog sila sa pagpanalipod sa kalikupan ug responsibilidad usab nila ang pag-atiman niini.

Matud sa Waterworld, bag-o pa nila nga gi-engage ang hauling contractor aron mangolekta, magdala ug maglabay sa natapok nga basura subay sa mga balaod ug regulasyon ug nisalig sila nga ang contractor motuman sa hustong proseso.

Human sa mga report, gilusad dayon sa kompaniya ang internal investigation ug gi-contact nila ang contractor.

Gipasalig usab nila ang hugot nga kooperasyon ngadto sa mga otoridad nga nag-imbestigar sa maong hitabo.

Matud usab sa Waterworld nga kon mapamatud-an nga ang contractor adunay nahimong kalapasan, ilang ipahigayon ang mga legal nga aksiyon aron adunay manubag as insidente.

Samtang, gilusad usab sa kagamhanan sa Dakbayan sa Talisay ang imbestigasyon human nasikop ang usa ka wing van nga giingong nisulay og labay og mga basura diha sa Sitio Tabok Sapa, Barangay Jaclupan.

Gibutyag ni Gullas nga ang opisyales sa barangay maoy nakasakop sa maong sakyanan ug nipahibalo dayon ngadto sa kapolisan ug sa siyudad.

Base sa inisyal nga imbestigasyon sa siyudad, giingong ang contractor nga si Jovanny Coyoca maoy nikuha kang "Bimbo" aron maglabay sa basura nga maoy nikuha usab sa wing van driver nga si Jerome Rivera.

Gikataho nga adunay usa pa ka tawo nga nailhang "Niko" nga taga Barangay Jaclupan ang nalambigit usab sa maong plano.

Si Rivera ug Coyoca gipaubos sa kustodiya sa mga otoridad samtang nagpadayon ang imbestigasyon.

Gipasalig ni Gullas nga mapasakaan og mga kasong kriminal, civil ug administratibo ang tanang mapamatud-ang responsable sa maong insidente. BDB BANAT NEWS