5 ataul may ‘anti-China’, ‘anti-CPP’ ikinalat sa Metro Manila
MANILA, Philippines — Limang abandonadong kabaong na may mga anti-China at anti- Communist Party of the Philippines na mensahe ang natagpuan sa magkakahiwalay na lugar sa Metro Manila kahapon.
Sa inisyal na ulat, inabandona ng mga nakasuot na mask na mga lalaki at isang babae, at sakay ng gray at puti na ban dakong alas-2:00 ng madaling araw ang limang ataul sa bahagi ng Rizal Ave. Ext., Sta. Cruz, Manila; sa Brgy. 54, Caloocan City; Brgy. South Triangle, Quezon City; Brgy. Sta. Teresita, Quezon City; at Gil Puyat, Makati City.
Nakita sa mga kabaong ang mga larawan ng Pangulong si Xi Jinping at iba pang opisyal ng China.
“NCRPO is treating these incidents as deliberate acts intended to attract attention, provoke public reaction, and possibly create unnecessary alarm. Police units across Metro Manila have been directed to strengthen vigilance and prevent any similar occurrence while the investigation continues,” sa pahayag ng NCRPO.
Inutos naman ni PNP Chief Gen. Jose Melencio Nartatez Jr. ang masusing imbestigasyon sa insidente kasabay ng panawagan sa publiko na maging kalmado at huwag magpakalat ng hindi beripikadong impormasyon at agad i-report sa pinakamalapit na himpilan ng pulisya ang anumang kahina-hinalang aktibidad.
Kasalukuyan na ring nire-review ng NCRPO ang mga CCTV footages upang matukoy ang pagkakakilanlan ng mga responsable. Anang NCRPO, tinatrato nila ang insidente bilang “deliberate acts” upang makakuha ng atensyon, magdulot ng public reaction at lumikha ng pangamba.
Dahil dito, inatasan ang mga police units sa Metro Manila na paigtingin ang pagbabantay at tiyaking hindi na mauulit ang katulad na insidente.
Iginiit ng NCRPO na hindi palalampasin ang naturang insidente at tiniyak na sasampahan ng kaukulang kaso ang mga nasa likod nito kapag natapos ang imbestigasyon.
- Latest
