Castro: VP Sara namemersonal kapag hindi makasagot?
MANILA, Philippines — “Kapag hindi niya nasasagot ang aking mga nasasabi, magsisimula na siyang mamersonal at manira ng walang basehan. Hindi iyan professional.”
Ito ang buwelta ni Presidential Communications Office (PCO) at Palace Press Officer Undersecretary Claire Castro kay Vice President Sara Duterte tawaging “unprofessional” ng pangalawang pangulo.
Giit niya, bilang Palace Press Officer, tungkulin niyang ipaalam sa publiko ang mga proyekto at programa ng Pangulo at ng administrasyon, gayundin ang pagsugpo sa maling impormasyon. Aniya, sumasagot lamang siya sa mga walang basehang akusasyon laban sa Pangulo at sa gobyerno, at laging may kalakip na ebidensya.
Dagdag pa ni Castro, ang tunay na professional ay nakikita sa gawa at hindi sa salita lamang. Ang isang lider na propesyonal, ayon sa kanya, ay nananatili sa bansa upang mamuno lalo na sa oras ng kalamidad, sumusunod sa batas, hindi gumagamit ng dahas, at humaharap sa mga akusasyon gamit ang malinaw na ebidensya.
“Tumulong sa pag-unlad at hindi nagiging dahilan ng pagbagsak ng pamahalaan,” pahayag pa ni Castro.
Kung susuriin umano ang pamantayan ng propesyonalismo at pananagutan, malaki ang kakulangan ni Vice President Duterte sa pagpapakita ng mga ito.
- Latest
