Chinese national gidakop tungod sa pekeng Magic Sarap

CEBU, Philippines — Gidakop sa mga operatiba sa Criminal Investigation and Detection Group Regional Field Unit 7 – Mandaue City Field Unit (CIDG-7 MCFU) ang usa ka 62-anyos nga Chinese national tungod sa alegasyong namaligya kini og pekeng Magic Sarap diha sa iyang tindahan sa Tabobanay, Barangay Sto. Niño, Cebu City, udtong tutok kagahapon, Huwebes, Agosto 6, 2026.

Ang operasyon gihimo sa CIDG-7 MCFU uban sa mga representante sa Nestlé Philippines nga gipangulohan ni Atty. Cara Rosete.

Sumala sa CIDG, ang suspek giingong nalambigit sa pagapud-apod ug pagpamaligya sa peke nga MAGGI Magic Sarap ug uban pang mga produkto, nga giingong paglapas sa Republic Act No. 8293 o ang Intellectual Property Code of the Philippines.

Narekober sa operasyon ang kapin sa 880 ka kahon sa giingong peke nga mga produkto nga adunay gibanabana nga kantidad sa merkado nga P4.2 milyones.

Matud sa mga otoridad, ang maong mga produkto wala gihimo o giapod-apod ubos sa kalidad ug mga regulasyon nga gisunod sa mga tinuod nga produkto sa Nestlé.

Gipasabot sa CIDG nga ang pagpalsipikar o paghimo og peke nga mga produkto usa ka ilegal nga kalihokan nga makalimbong sa mga konsumidor ug makadaot sa mga lehitimong negosyo.

Matud pa ni PMaj. Melvin Mangahas, representante sa CIDG, nagpadayon ang ilang kampanya batok sa pagpamaligya og mga peke nga produkto aron mapanalipdan ang mga konsumidor ug masiguro nga ang mga baligya sa merkado lehitimo ug luwas gamiton.

Samtang, nagpasalamat ang Nestlé Philippines sa CIDG tungod sa dali nilang aksyon sa pagpatuman sa balaod batok sa pagpalsipikar sa mga produkto.

Giawhag usab sa kompanya ang publiko nga mopalit lamang sa mga kasaligan ug awtorisadong tindahan ug i-report dayon ang mga kadudahang produkto ngadto sa Nestlé Consumer Services o sa mga otoridad.

Ang suspek anaa karon sa Custodial Facility sa CIDG RO7 mag atubang og kasong paglapas sa Republic Act No. 8293. IBM BANAT NEWS