Bail grant kay Revilla nakabatay sa ebidensya, hindi sa paratang – Sandiganbayan

MANILA, Philippines — Binibigyang-diin ng Sandiganbayan sa 176-pahinang resolusyon na ang pagpapahintulot sa piyansa ni dating senador Ramon “Bong” Revilla ay nakabatay sa prinsipyo ng batas: ang hatol ay dapat umayon sa ebidensiyang naiharap sa korte, hindi sa opinyon ng publiko.

Sa desisyong inilabas ng Third Division noong Hulyo 31, 2026, nabigo ang prosekusyon na maglatag ng matibay na ebidensya laban kay Revilla kaugnay ng umano’y maanomalyang flood control project sa Pandi, Bulacan. Bagama’t sinampahan siya ng Ombudsman ng kasong malversation of public funds through falsification of public documents, nakita ng hukuman na kulang ang mga dokumento at testimonya upang patunayan ang sabwatan.

Itinuro ng korte na bilang chairman ng Senate Committee on Public Works, walang kapangyarihan si Revilla na magpasok ng proyekto sa pambansang badyet nang mag-isa. Ang proseso ng pag-apruba ay dumaraan sa Senado, Kamara, at Bicameral Conference Committee. Wala ring naipakitang direktang ebidensya na nag-uugnay sa kanya sa umano’y kahilingan ng listahan ng proyekto o sa sinasabing kickback arrangement.

Sa hiwalay na opinyon, binigyang-diin ni Associate Justice Ronald Moreno na ang mga alegasyon ng prosekusyon ay nakasalalay sa testimonya ni dating DPWH Undersecretary Roberto Bernardo, ngunit kulang sa independiyenteng ebidensyang sumusuporta. Dagdag pa niya, kahit ipagpalagay na may kahilingan si Revilla sa listahan ng proyekto, maaari itong maiugnay sa kanyang opisyal na tungkulin at hindi awtomatikong patunay ng iligal na layunin.

Pinagtibay ng korte na ang conspiracy ay dapat mapatunayan ng malinaw na ebidensya, hindi ng hinala o espekulasyon. Dahil dito, pinagbigyan ang aplikasyon ni Revilla para sa piyansa at iniutos ang kanyang pansamantalang paglaya habang nagpapatuloy ang paglilitis.