Pilipinas wala pay bakuna kontra Dengue
CEBU, Philippines — Giduso sa usa ka pediatric infectious disease specialist ang dali nga pag-aprubar sa bag-ong dengue vaccine sa Pilipinas nga giingong mahimong dugang panalipod batok sa sakit ilabina karong gilauman nga mosaka pa ang kaso sa dengue tungod sa ting-uwan.
Si Dr. Jonathan Lim, board member sa Pediatric Infectious Disease Society of the Philippines ug chair sa Committee on Immunization, miingon nga dako unta ang matabang sa bakuna aron mapakunhod ang grabeng epekto sa dengue.
Matud ni Lim, gilauman pa nilang mosaka ang kaso sa dengue sa umaabot nga mga bulan tungod kay nagsugod pa lamang ang ting-uwan.
“Yeah we see that kay karon pa man nagsugod-sugod ang uwan nato. We expect the dengue cases to go up in the next few months,” matud niya.
Wala pay dengue vaccine nga naaprubahan diri sa Pilipinas bisan og naa na ni sa ubang nasud.
Gipasabot ni Lim nga dili ni parehas sa kontrobersiyal nga Dengvaxia nga nahimong isyu kaniadto.
“There's another brand that's available in many countries... naghuwat ta nga ma-approve siya sa FDA para maprotektahan ang mga tawo labi na ang mga bata,” dugang niya.
Matud pa niya, dili garantiya nga dili na matakdan og dengue ang usa ka tawo kun mabakunahan, apan makatabang ni aron dili mograbe ug malikayan ang pagkaospital parehas sa bakuna batok sa COVID-19.
Ang maong bakuna nga Qdenga or TAK-003 giaprubahan na sa 43 ka nasud ug kapin 32 milyones ka doses na ang nagamit sa tibuok kalibotan.
Samtang wala pa kini maaprubahi sa Pilipinas, nagpadayon ang pagsaka sa mga kaso sa dengue sa Sugbo.
Sumala sa Provincial Health Office, adunay 381 ka kumpirmadong kaso sa dengue sa lalawigan niadtong Hulyo, samtang ang Cebu City nakatala usab og 1,228 ka kaso ug 10 ka namatay gikan Enero hangtod Hulyo 18.
Bisan adunay paglaom nga maaprubahan ang bakuna sa umaabot, giingon ni Lim nga dili kini mahimong kapuli sa ubang paagi sa pagpugong sa dengue. Giawhag niya ang publiko nga ipadayon ang Five S batok sa dengue, limpyohan ang palibot, dili balewalaon ang hilanat aron malikayan ang grabeng komplikasyon sa sakit. (BANAT NEWS)
- Latest
