Revilla, pinayagan P1 milyong piyansa sa flood control case
MANILA, Philippines — Pinayagan ng Sandiganbayan Third Division ang hiling ng kampo ni dating Senador Ramon “Bong” Revilla Jr. na makapaglagak ng piyansa kaugnay ng kasong malversation na may kinalaman sa P92.8-milyong ghost flood control project sa Pandi, Bulacan.
Kinumpirma ito ni Atty. Dennis Pulma, Clerk of Court ng Third Division, ngunit ibinasura ng graft court ang kahalintulad na bail petition ng mga kapwa-akusado ni Revilla.
Ayon sa Sandiganbayan, pinayagan si Revilla na makapagpiyansa dahil nabigo ang prosekusyon na magpakita ng matibay na ebidensya ng pagkakasala ng dating senador.
Nauna nang nagpasok ng not guilty plea si Revilla sa arraignment ng Third Division para sa kasong malversation, habang ang kanyang mga kapwa-akusado ay pawang nagpasok din ng not guilty plea.
Nagkakahalaga ng P1 milyon ang piyansa para sa kasong malversation ni Revilla.
Samantala, sa hiwalay na kaso ng graft na may kaugnayan din sa naturang ghost project, ang Sandiganbayan Fourth Division ang nagpasok ng not guilty plea para kay Revilla.
Sa kasalukuyan, nakakulong si Revilla sa Quezon City Male Dormitory sa Payatas, Quezon City.
- Latest
