‘Irrelevant questions’, nagpapabagal sa impeachment trial - Lacson
MANILA, Philippines — Sinabi kahapon ni Senator-Judge Panfilo “Ping” Lacson na ang mga “irrelevant questions” ng ilang senator-judge ay nagpapabagal sa impeachment trial ni Vice President Sara Duterte-Carpio, habang sinusubok ang pasensya ng mga sumusubaybay sa mga pagdinig.
Bagama’t pinagbibigyan ni Impeachment Court Presiding Officer Francis Escudero ang kanyang mga kapwa senator-judge bilang paggalang, dapat din silang maging “discerning” upang matukoy kung alin sa mga tanong ang nararapat sa mga pagdinig.
Sinabi ni Lacson na makatutulong ang regular na caucus nang lahat ng senator-judge upang matugunan ang isyu, dahil magsisilbi itong palagiang paalala sa wastong asal at sa mga uri ng tanong na dapat ihain sa panahon ng paglilitis.
Aniya, bagama’t ang ilang irrelevant questions ay maaaring bunga ng emosyon o personal na pagkiling sa panig ng prosekusyon o depensa, makatutulong ang mga caucus na ipatatawag ng Senate President at Presiding Officer upang paalalahanan ang mga senator-judge na manatiling objective.
Sinabi rin ni Lacson na napakabagal ng takbo ng impeachment trial sa kabila ng desisyon ng prosekusyon na bawasan ang bilang ng mga testigong ihaharap nito.
- Latest
