Problema sa basura hayan mosamot pa

Pito na ka buwan sukad naproblema ang syudad og labayanan og basura tungod sa pagsirado sa Binaliw landfill niadtong Enero human sa nahitabong landslide. Apan hangtod karon wala pay klarong sulbad ang administrasyon ni Mayor Nestor Archival sa problema.

Hangtod ron nagtipun-og ang basura sa kabarangayan tungod kay way klarong kalabayan. Ang mga barangay naglibog sab asa nila ihatod ang ilang makolektang basura hinungdan nga daghan sa mga barangay ang mihunong sab sa naandan nilang schedule sa pagpangolekta og basura.

Sigun sa akong tinubdan katulo nalang sa usa ka semana mangolekta og basura ang mga barangay apan dili tanan nilang makolekta mahimong ilabay sa temporary transfer station diha sa South Road Properties tungod kay gilimitahan ang gidaghanon sa ilang paghakot og basura.

Sigun sa akong tinubdan kausa ra pwedeng molabay diha sa transfer station ang mga garbage truck gikan sa kabarangayan. Ang resulta tigumon sa mga barangay ang ilang basura sa usa ka dapit nga mao say magsilbing transfer station diha sa barangay.

Ang uban anaa na ibilin sa daplin sa kadalanan hinungdan nga labihang hugawa sa syudad sa pagkakaron. Ug nabalaka ko nga dili pa ni masulbad ug posibling mosamot pa ang problema tungod kay sugod sunod semana dili na mahimong molabay og basura sa transfer station sa SRP.

Kini tungod kay illegal ang operasyon sa transfer station sanglit wala ni permit gikan sa Environmental Management Bureau (EMB) ug duna nay cease and desist order batok niini.  Gipahibawo hinuon sa mayor nga ang private contractor sa syudad nga maoy mohakot sa mga basura paingon sa landfill sa Aloguinsan mao nay direktang mangolekta sa basura didto sa kabarangayan.

Ambot og duna bay katakos ang kontraktor pagpangolekta sa tanang sityo sa 80 ka mga barangay sa syudad. Kun ibutang ta lang og usa ka truck matag-barangay, magkinahanglan ang private contractor og 80 sab ka mga garbage truck.

Mao nga sigurado ko nga mosamot pa ang problema sa magpundok nga basura diha sa kabarangayan sugod sunod semana. Ang posibling mahitabo niini mao nga adto na sab sa mga barangay mismo magbuhat og illegal dumpsite nga posibling makahatag og dakong hulga sa panglawas sa publiko.

Sa kadugay na niining maong problema, ambot nganong daw sa wala ni hatagi og prioridad sa mayor aron pangitaan og mas malungtaron nga solusyon.