"BOPOL" nga Senador?

Mipadayag si Senador Panfilo Lacson sa iyang kahikurat uban ang pagsaway sa usa ka senator-judge nga gihinganlan niyag “bopol” (bugô) tungod kay matud pa na-lektyuran kini sa usa ka counsel atol sa impeachment hearing. Gihulagway ni Senator Lacson nga  bakikaw ug makauulaw ang maong sitwasyon tungod kay karon pa siya makasugat nga ang judge lektyuran sa counsel. Apan komento usab sa akong amigo, “Kon una’ng higayon kini nasinati ni Lacson nga adunay senator-judge nga na-lektyuran, unang higayon pa usab kini nga usa ka senator-judge mihingalan og bogô sa iyang kauban’g senator-judge gawas na sa impeachment court.”  Fezteleern!

Ministerial duty lang

Mipadayag si kanhi DPWH Region IV-B Maintenace Division Chief Juliet Calvo ngadto sa Sandiganbayan, nga ang pagpirma sa mga project inspection reports usa lamang ka “ministerial duty” alang kanila tungod kay misalig lang siya sa mga geotagged nga hulagway nga gi-attached sa voucher.  Depensa kini ni Calvo sa kaso’ng malversation nga iyang giatubang kabahin sa anomalosong road dike project sa Naujan, Oriental Mindoro.   Apan ginaingon man nga, “Ang ministerial duty usa lamang ka “laysho” nga termino diin ang gipasabot mao nga gihiktan ang iyang mga kamot apan abli kaayo ang iyang bulsa.” Madahaan!

‘Pangayo kay hatagan’

Namahayag ang Malacañang nga ang Senate impeachment court adunay kagahum nga ipa-subpeona ang mga tax ug bank records ni Bise Presidente Sara Duterte human ang tribunal mitugot sa hangyo sa House prosecution panel kabahin sa maong mga dokumento. Tataw na nga uyon ang presidente sa hukom sa tribunal. Sumala man gud sa Section 71 sa National Internal Revenue Code, kinahanglan gayod ang pagtugot sa presidente kon ang prosekusyon magkinahanglan og access sa BIR records sa bise presidente. Adunay tudling sa bibliya nga nag-ingon “pangayo kay kamo pagahatagan, apan ni’ng kahimtanga, wa pa gani mangayo, gihatag na daan.”  Saoonz!

Parehas ra’s wala

Sumala pa ni Assistant Ombudsman Mico Clavano, misuway gihapon si Former House Speaker Martin Romuldez paglangyaw ngadto sa laing nasud bisan pa man sa travel ban nga giluwatan sa Sandigangbayan batok kaniya.  Wala pa gayud makapasaka ang Ombudsman og kaso batok kang Romualdez apan ni’ng pagpunay’g pasiatab sa Ombudsman nga hapit na nila i-file ang kaso, natural nga maningkamot ang hingtungdan sa pagsibat. Haum ang obserbasyon nga, “Nagsige lang og pasiatab ang Ombudsman nga hapit na nila i-file ang kaso, wa ba sila masayod nga ang "hapit” parehas ra sa wala.”  Muleeng!

Bias ba si Matibag

Miangkon si NBI Director Melvin Matibag, atol sa pag-cross-examine kaniya sa impeachment trial ni Bise Presidente Sara Duterte, nga ang iyang asawa nga si Laguna 1st District Representative Ann Matibag usa sa mga mi-endorso sa Articles of Impeachment ngadto sa senado.  Ni’ng kahimtanga, dili kalikayan nga magduda kita nga bias si Matibag sa iyang testimoniya bisan pa man sa iyang pangulipas. Kay ginaingon baya nga, “Ang kaminyoon usa ka matang sa relasyon diin ang usa ka persona kanunay'ng husto ug ang laing persona mao ang bana.”  Pagkatoytoy!