Mangrobang, Ellis babandera sa Philippine triathlon team sa Asiad
MANILA, Philippines — Babanderahan nina veteran Kim Mangrobang at rising star Kira Ellis ang Philippine national triathlon team sa pagsabak sa parating na 20th Asian Games sa Aichi-Nagoya, Japan sa Setyembre.
Sasalang ang 34-anyos na si Mangrobang sa mixed relay event, habang lalahok ang 17-anyos na si Ellis sa women’s individual kagaya ni Raven Alcoseba.
Hindi pa nananalo ng medalya si Mangrobang sa Asian Games bagama’t mayroon siyang limang gold medals sa Southeast Asian Games sa individual (tatlo), mixed relay (isa) at women’s team relay (isa).
May tatlong silver din siya sa SEA Games sa individual (dalawa) at mixed relay (isa).
Kakampanya naman sina Fer Casares Tan at Aki Lorbes sa men’s individual division ng Aichi-Nagoya Asiad na nakatakda sa Setyembre 19 hanggang Oktubre 4.
Kasalukuyang nagsasanay ang mga Pinoy triathletes sa Spain, Portugal, Indonesia at China bilang bahagi ng kanilang preparasyon para sa continental meet.
Wala pang nakukuhang medalya ang Pilipinas sa triathlon sa Asian Games simula nang maisama sa calendar of events noong 2006 sa Doha, Qatar.
Sa nakaraang edisyon ng Asiad noong 2023 sa Hangzhou, China ay nag-uwi ang mga Pinoy athletes ng kabuuang apat na ginto, dalawang pilak at 12 tansong medalya para tumapos sa No. 17 sa overall medal standings.
Ang apat na golds ay nagmula sa Gilas Pilipinas men’s team at kina pole vaulter EJ Obiena at jiu-jitsu artists Meggie Ochoa (women’s -52 kg) at Annie Ramirez:(women’s -57 kg).
- Latest
