Rabiya final na ang pagtungha og medisina

CEBU, Philippines — Malipayong gipahibalo sa beauty queen-actress nga si Rabiya Mateo nga opisyal na siyang naka-enrol sa Doctor of Medicine program sa University of Santo Tomas (UST). 

Gipaambit ni Rabiya sa iyang Instagram Story ang usa ka screenshot nga nagpakita sa pag-enroll , nga nagtimaan sa pagsugod sa bag-ong hugna  sa iyang kinabuhi ,ingon man usab sa iyang tinguha nga mahimong doktor. 

Suma pa sa aktres nga dugay na niyang gipangandoy ang pagsulod sa medisina, ug bag-o lang usab niyang gipahibalo nga nakakuha siya og 741 General Performance Score (GPS) sa National Medical Admission Test (NMAT), usa ka mahinungdanong lakang aron makasulod sa medical school.  

Angia miawit sa “Hidden” alang  sa “The Loyalty Game”

Gipakusgan  sa  singer-songwriter nga si Angia Laurel ang emosyon ug misteryo sa ABS-CBN suspense-thriller series nga “The Loyalty Game” pinaagi sa iyang pag-awit sa opisyal nga soundtrack nga “Hidden.”

Ang maong alternative rock song naghisgot sa kasakit sa paghigugma sa usa ka tawo nga puno sa mga tinago ug mga bakak. Ang maong awit gisulat ug giprodyus ni Jonathan Manalo, ang head sa creatives, content, ug operations sa ABS-CBN Music.

Una nga nailhan si Angia  pinaagi sa iyang awit nga “Back Again,” nga nahimong kabahin sa soundtrack sa “High Street.” Gisundan kini sa usa ka reimagined version sa kanta kauban si Moophs ubos sa Tarsier Records, ug dayon gipagawas ang iyang ikaduhang single nga “Talon.”

Gawas sa iyang karera sa musika, aktibo usab ang 23-anyos nga singer-songwriter sa teatro ug makeup artistry, nga nakatabang sa pagpalambo sa iyang talento ug kahibalo sa visual storytelling.

Ang  “The Loyalty Game” kay gibidahan nila Jericho Rosales ug Janine Gutierrez.

Makita ang  “The Loyalty Game” sa Prime Video, samtang ang “Hidden” ni Angia  mahimo nang paminawon sa nagkalain-laing digital streaming platforms.