Bag-ong House Rules sa konseho sa siyudad gilalisan

CEBU, Philippines — Init ang diskusyon bahin sa gisugyot nga bag-ong House Rules sa konseho sa Dakbayan sa Sugbo human mipadayag og kabalaka si Minority Floor Leader Sisinio Andales nga malimitahan na ang papel ni Bise Mayor Tomas Osmeña.

Sa bag-ong House Rules, dili na mamahimong moapil si Bise Mayor Tomas Osmeña sa mga argumento sa konseho ug magpabilin kini sa iyang katungdanan isip Presiding Officer.

Nisupak si Andales tungod kay matud pa nga wala hatagi og igo nga panahon ang mga konsehal aron mabasa ug matun-an ang mga giusab nga lagda.

Matud pa ni Andales nga importante nga ang tanang miyembro masayod sa unod sa bag-ong House Rules isip kabahin sa procedural due process. Iyang gipadayag nga unang higayon niya nga mabasa ang dokumento ug angayan unta konsultahon ang konseho ilabi na sa mga probisyon nga adunay dakong epekto sa katungdanan sa bise mayor.

Usa sa mga probisyon nga iyang gikuwestiyon mao ang dili na makaapil ang presiding officer sa deliberasyon.

Nitubag si Konsehal Mikel Rama nga ang mga rebisyon gituyo lamang aron ipahiuyon ang House Rules subay sa gipagawas sa Department of the Interior and Local Government (DILG) sa Section 49 sa Local Government Code.

Gipasabot ni Rama nga ang bise mayor magpabiling presiding officer sa konseho ug dili mahimong mosponsor og mga legislative measure, mangulo sa standing committees, aktibong moapil sa debate, o maghatag og privilege speech, gawas lamang kung mobotar kun adunay tie breaker.

Bisan pa niini, si Andales nagkanayon nga ang opinyon sa DILG usa lang ka rekomendasyon ug dili pinal. Gibasol sab niya ang mayoriya sa pagpadali sa proseso bisan pa og wala matuki pag-ayo ang rebisyon.

Si Konsehal Philip Zafra miila sa kabalaka ni Andales apan bisan og gusto usab niya nga adunay aktibong papel ang bise mayor sa deliberasyon, apan iyang giklaro nga kinahanglan sundon sa konseho ang interpretasyon sa DILG.

Nisugyot sab si Konsehal Paul Labra II nga maghimo og working group nga adunay mga representante gikan sa mayoriya ug minoriya aron motan-aw sa umaabot nga mga rebisyon sa House Rules.

Ang maong House Rules girefer balik sa Committee on House Rules and Oversight alang sa dugang nga pagtuon. (BANAT NEWS)