2 estudyante, nahulihan ng marijuana sa paaralan

MANILA, Philippines — Dalawang estud­yante ang arestado matapos na mahulihan ng hinihinalang high-grade marijuana o kush sa loob ng isang paaralan sa Mandaluyong City kama­kalawa. Nakatakdang sampahan ng kaukulang kaso sa piskalya ang 18-anyos na estudyante na hindi na pinangalan ng mga awtoridad habang isasailalim naman sa protective custody at ire-refer sa Bahay Pag-asa youth center ang isa pang suspek na 17-anyos lamang.

Batay sa ulat ng National Capital Regional Police Office (NCRPO), naaresto ang mga suspek nang magsagawa ng pagsasaliksik sa loob ng isa sa mga silid-aralan ng naturang public school sa ­Barangay Addition Hills.

Isang guro umano ang nag-initiate ng search matapos matanggap ang sumbong na may estud­yanteng nawawalan ng cellphone at cash.

Tinangka pa umano ng isa sa mga estud­yante na tumakas ngunit napigilan ng guwardiya. Malaunan, isinuko nito sa mga awtoridad ang isang eco-bag na naglalaman ng ilang sachets ng hinihinalang kush at drug paraphernalia.

Nasita naman ang menor-de-edad na estudyante matapos na tangkaing hadlangan ang inspeksiyon.

Ayon sa pulisya, nasa kabuuang 33 sachet ng suspected kush, na tumi­timbang ng 40 gramo at tinatayang nagkakahalaga ng P60,000 ang narekober sa mga estudyante.