Nutrition Month celebration dinhi sa rehiyon sugdan karon

CEBU, Philippines —  Sugdan sa National Nutrition Council sa Central Visayas (NNC-7), uban sa mga kaabag nga ahensya, ang ika-52 nga Regional Nutrition Month celebration karong adlawa, Hulyo 5, sa Mandaue City Sports Complex pinaagi sa “Run for Roots” nga kalihokan, nga naghiusa sa pagpalambo sa kahimsog ug pag-atiman sa kalikupan.

Ang regional launching nagdala sa nasyonal nga tema karong tuiga nga “Sa PPAN: Sama-sama sa Nutrisyong Sapat, Para sa Lahat!” ug sa sub-tema nga “Nutrisyon at Kalikasan, Ating Pangalagaan!”, nga naghatag og gibug-aton sa lig-on nga koneksyon tali sa nutrisyon, seguridad sa pagkaon, ug pagkamalahutayon sa kalikupan.

Kabahin kini sa nasudnong pagsaulog sa ika-52 nga National Nutrition Month nga opisyal nga gilunsad niadtong Hulyo 1 sa Dakbayan sa Dumaguete, Negros Oriental, pinaagi sa panagtambayayong sa National Nutrition Council ug sa City Government of Dumaguete.

Gitambongan ang nasudnong launching sa mga representante gikan sa nagkalain-laing ahensya sa gobyerno, lokal nga kagamhanan, pribadong sektor, mga organisasyon sa katilingban, ug akademya aron mapalig-on ang paningkamot sa pagpalambo sa seguridad sa pagkaon ug malungtarong food systems. Ang kampanya karong tuiga nagpasabot nga ang maayong nutrisyon adunay suod nga kalambigitan sa himsog nga kalikupan, tungod kay ang food systems adunay direktang epekto sa atong natural nga kahinguhaan.

Atol sa press conference nga gipahigayon sa miaging mga adlaw, si Dr. Niño Archie Labordo, regional nutrition program coordinator sa NNC-7, miingon nga ang sub-tema sa Nutrition Month 2026 naghatag og gibug-aton sa kamahinungdanon sa pagpanalipod sa kalikupan isip pundasyon sa himsog ug malungtarong suplay sa pagkaon.

Matod niya kung dili nato ampingan ang atong kinaiyahan, maapektuhan usab ang atong pagkaon ug ang nutrisyon sa katawhan.

Gipasabot niya nga ang pag-atiman sa kalasangan, watershed, yutang pang-agrikultura, ug uban pang natural nga kahinguhaan maoy yawe aron masiguro ang lig-on nga suplay sa masustansiyang pagkaon alang sa karon ug sa umaabot nga mga henerasyon.

Ang “Run for Roots” maoy nag-unang kalihokan sa regional launching, nga nagdasig dili lamang sa pagpalambo sa pisikal nga kahimsog kondili usab sa pag-atiman sa kinaiyahan, pinaagi sa pagpahinumdom sa publiko nga ang himsog nga katawhan nagsalig sa himsog nga kalikupan.(CEBU NEWS)