Konseho sa Dakbayan sa Sugbo nibasura sa realignment sa CBRT

CEBU, Philippines — Gibasura sa konseho sa Dakbayan sa Sugbo ang gisugyot sa Department of Transportation (DOTr) nga realignment sa Cebu Bus Rapid Transit (CBRT) diin apilon ang South Road Properties.

Atol sa gipahigayon nga special session kagahapon gituki ang resolusyon nga giduso ni Bise Mayor Tomas Osmeña nga kinahanglang ibalik ang orihinal nga rota sa CBRT gikan sa Barangay Bulacao hangtud sa Barangay Talamban.

Unang gituki ang orihinal nga resolusyon nga nag-awhag lang sa DOTr sa pagsalikway sa realignment apan giusab kini pinaagi sa pag-amendar ni Osmeña aron klarong ipadayag nga ang kagamhanan sa Dakbayan sa Sugbo ang mismong nisalikway sa gisugyot nga kausaban sa rota nga apilon ang SRP.  Matud sa bise mayor nga kong ang resolusyon magpabiling usa lang ka hangyo ngadto sa DOTr adunay kagawasan ang nasudnong kagamhanan sa pagpadayon sa realignment bisan pa kon supakon kini sa siyudad. Nabahin ang konseho diin nipabor ang mga konsehal nga sila si Philip Zafra, Pablo “Paul” Labra II, Michelle Abella-Celona, Sisinio “Bebs” Andales, Alvin Arcilla ug Joel Garganera ug si Osmeña nga dili apilon ang SRP sa rota sa CBRT.

Samtang supak sila si Konsehal Pastor "Jun" Alcover,Jr. ug Konsehal Harry Eran. Ni-abstain sila si Konsehal David “Dave” Tumulak, Konsehal Winston Pepito, Konsehal Mikel Rama ug Konsehal Nyza “Nice” Archival ug nipadayag kini nga nagkinahanglan pa sila og dugang panahon aron tun-an ang legal nga implikasyon sa maong lakang.

Ang giaprobahang resolusyon nagmando sa pagbalik og pagpatuman sa orihinal nga CBRT alignment gikan sa Barangay Bulacao hangtud sa Barangay Talamban nga mao ang unang giplano ug giaprobahan ug gipundohan sa World Bank ug gipaila sa publiko.

Gitumbok ni Osmeña nga ang paghatag og prayoridad sa SRP mahimong mopalayo sa orihinal nga katuyoan sa proyekto nga mao ang pagserbisyo sa mga ordinaryong Sugboanon.

Sa habig ni CBRT Project Manager Norvin Imbong, nipasabot kini nga wala gibasura ang orihinal nga Bulacao–Talamban alignment ug nagpabilin kini nga bahin sa proyekto base sa naaprobahan sa NEDA sukad pa niadtong 2014.

Matud ni Imbong nga giuna lang ang SRP tungod kay mas sayon kini nga ipatuman samtang dili pa mapupos ang tagal sa loan sa World Bank karong Septiyembre 2026.

Si Imbong nagkanayon nga gamay na lang ang trabahuon sa right-of-way acquisition sa SRP mao nga mapaspasan ang pagsugod sa construction sa mga estasyonan ug magamit pa ang nahibiling loan.  Samtang, ang orihinal nga rota nagpadayon gihapon sa pag-atubang sa dagkong hagit sama sa right-of-way acquisition ug adunay mga residente nga kinahanglan nga ma-demolish ang ilang mga balay.

Ug kinahanglang mapalit ang 121 ka lote diin 39 ang anaa sa negotiated sale ug 82 ang manginahanglan og expropriation diin walo pa lang ka lote ang nabayran hangtud karon. Gitapos ang sesyon pinaagi sa pag-aproba sa konseho nga ipadayon ang implementasyon sa CBRT base sa orihinal nga Bulacao–Talamban ug walay labot ang SRP. BDB BANAT NEWS