Shabu, armas, marijuana sakmit sa managlahing buy bust

CEBU, Philippines — Duha ka lalaki ang nadakpan sa buy-bust operation nga gipahigayon sa Regional Police Drug Enforcement Unit 7 (RPDEU7) ug Police Station 4 sa Cebu City Police Office sa Barangay Carreta, Cebu City, sayong buntag sa Miyerkules, Hulyo 1.

Ang operasyon gihimo alas 5:10 sa buntag sa G. Gaisano Street ubos sa koordinasyon sa Philippine Drug Enforcement Agency Region 7 (PDEA-7).

Ang target sa operasyon giila nga si Peter Paul Cabahug Casas, 28 anyos usa ka assistant Land Surveyor, residente sa Barangay Camputhaw, Cebu City. Nadakpan usab ang iyang giingong kauban nga si Francis Paul Sario Agunod, 28 anyos, nga usa ka seaman ug residente sa Barangay Tisa, Cebu City.

Narekober sa mga otoridad ang gibana-banang 20 ka gramo sa gidudahang marijuana o Kush nga adunay Standard Drug Price (SDP) nga ?20,000.

Gikan kang Casas, nasakmit ang tulo ka pakete sa gidudahang Kush, usa ka .22 caliber revolver nga adunay mga bala, ug usa ka itom nga belt bag nga gigamit isip sudlanan sa ilegal nga droga.

Samtang gikan kang Agunod, narekober ang buy-bust boodle money ug usa ka .38 caliber revolver nga adunay mga bala. Ang duha ka suspek nag-atubang og kasong paglapas sa Sections 5 ug 11, Article II sa Republic Act 9165 ug Republic Act 10591. Ang mga nakumpiskang ebidensya gisumite na sa Regional Forensic Unit 7 alang sa laboratory examination.

Samtang tulo ka gidudahang drug personality ang nadakpan sa buy-bust operation nga gihimo sa Cordova Municipal Police Station sa sitio Camolinas, Barangay Poblacion, Cordova, sayong buntag sa Miyerkules, Hulyo 1, 2026.

Nasakmit sa mga operatiba ang kapin 28 ka gramo sa gidudahang shabu nga adunay Standard Drug Price (SDP) nga P190,400, ug usa ka walay lisensiyang .22 caliber revolver nga adunay lima ka buhing bala.

Gawas sa shabu ug pusil, narekober usab sa mga operatiba ang daghang heat-sealed transparent plastic sachets nga adunay gidudahang shabu, usa ka coin purse nga gigamit isip sudlanan sa mga iligal nga droga ug pusil, ug uban pang ebidensiya nga gituohang may kalabutan sa ilegal nga kalihokan sa mga dinakpan. (BANAT NEWS)