PNP nabulaga sa INC rally sa EDSA
MANILA, Philippines — Inamin ng Quezon City government at Philippine National Police (PNP) na nabulaga sila sa biglaang rally ng Iglesia ni Cristo (INC) kahapon sa EDSA, Quezon City dahil wala itong permit at wala ring paunang abiso, kaya hindi sila nakapaghanda nang maayos.
Ayon kay Quezon City Public Order and Safety Department head Elmo San Diego, biglaan ang dagsa ng mga sumama sa rally na nagsimula bandang alas-3:00 ng madaling araw.
“Biglaan lahat. Hindi naman kami prepared na magkaka-rally. Katatapos lang ng malaking event namin diyan sa People Power Monument noong Sunday at matahimik naman. Nagulat na lang kami kaninang madaling-araw na nagsimula na ‘yung mobilization,” ani San Diego.
Maituturing anya, na illegal assembly ang ginawa ng INC bunsod ng kawalan ng permit subalit ipinatutupad pa rin nila ang maximum tolerance.
Sinabi ni PNP Public Information Office chief PCol. Allen Rae Co, tatlong raliyista ang inaresto habang tatlong pulis ang sugatan matapos magkatensiyon nang tangkain ng mga raliyista na iharang ang mga bus sa northbound lane ng EDSA.
Pinag-aaralan na rin ng PNP ang posibleng pagsasampa ng kaso sa mga nasa likod ng protesta at nakikipag-ugnayan na rin sila sa INC upang maresolba ang isyu. Lumutang sa rally si Batangas First District Rep. Leandro Leviste na nagpahayag na suportado niya ang pagtitipon para makiisa sa panawagan ng grupo.
Sinabi naman ni Quezon City Police District (QCPD) Spokesperson Maj. Jennifer Ganaban umaabot sa 15,000 ang mga lumahok sa rally kahapon.
Nag-isyu na rin ang permit para sa rally ng INC mula alas-8:00 ng umaga hanggang alas-8:00 ng gabi ngayong Miyerkules.
Tinatayang nasa 100,000 katao ang inaasahang dadalo sa pagtitipon ngayong alas-8:00 ng umaga hanggang alas-8 ng gabi.
Nakasaad aniya sa permit ang ilang kondisyon, kabilang ang pagsasagawa ng programa sa White Plains Avenue at Temple Drive sa Quezon City lamang, walang total road closure habang isinasagawa ang aktibidad, at pagpapanatili ng kalinisan at kaayusan sa lugar.
Nauna nang dumagsa ang mga miyembro ng INC sa EDSA People Power Monument nitong Martes para sa emergency rally bilang pagkondena sa umano’y “selective justice”.
- Latest
