Prosekusyon pinalakas puwersa sa impeachment

Nagdagdag ng 5 abogado

MANILA, Philippines — Lima pang private ­prosecutors ang idinagdag sa House prosecution panel para sa impeachment trial ni Vice President Sara Duterte sa Senado.

Ayon kay Liberal Partylist Rep. Leila de Lima, malugod niyang tinanggap ang paglahok nina Atty. Teodoro Te, Atty. Reynaldo Robles, Atty. Arnold Labay, CPA, Atty. Mae Divinagracia, at Atty. Benjamin “Jay” Tolosa Jr. upang tumulong sa panel.

Kasabay nito, itinalaga si dating Surigao del Norte Rep. Robert Ace Barbers bilang karagdagang tagapagsalita at impeachment adviser ng prosekusyon.

Binanggit ni De Lima na ang impeachment trial ay hindi pangkaraniwang usaping legal kundi isang proseso na itinatadhana ng Konstitusyon, kaya’t mahalaga ang masusing paghahanda, disiplina, at katapatan sa ebidensya.

“We welcome these seasoned lawyers because their experience will help the prosecution present its case clearly, responsibly, and with the seriousness that the Filipino people deserve,” aniya.

Si Atty. Te, dating Public Information Officer ng Korte Suprema (2013–2018) at interim chairperson ng Free Legal Assistance Group (FLAG), ang mangunguna sa bagong private prosecution team. Kilala siya sa malawak na karanasan sa constitutional litigation, human rights defense, at legal education.

Si Atty. Robles, founding partner ng Chan Robles & Associates, ay eksperto sa criminal at civil litigation, corporate law, at election law.

Si Atty. Labay, CPA, ay senior partner ng parehong law firm at may dekadang karanasan sa litigation at pagtuturo ng batas.

Samantala, si Atty. Divinagracia ay mana­ging partner ng Co Na­zario Velasco-Catera and Divinagracia Law Offices, na may expertise sa commercial at criminal litigation, arbitration, at corporate rehabilitation.

Si Atty. Tolosa Jr., legal spokesperson ng prosekusyon, ay may higit 17 taong karanasan sa financial crimes, constitutional law, at contractual disputes.

Si Barbers naman, dating gobernador at anim na terminong kongresista, ay kilala sa kanyang malinaw na pagpapaliwanag ng mga pambansang isyu at sa pagsusulong ng transpa­rency at accountability sa pamahalaan.

Sa ngayon ay umaabot na sa 15 ang bilang ng private prosecutors na pawang pro bono o libre ang serbisyo sa nasabing paglilitis.