Rugby boy na nanakit ng 2 senior, tiklo

MANILA, Philippines — Nadakip na ng mga awtoridad ang isang rugby boy na sangkot sa pananakit sa dalawang senior citizen sa loob ng isang pampasaherong jeep sa South Station, Muntinlupa.

Batay sa salaysay ng isang saksi, isang lalaking walang suot sa pang-itaas ang biglang sumakay sa jeep na sinundan ng tatlong lalaki saka pinagsusuntok.

Sa takot ng mga pasahero na baka lumala pa ang sitwasyon at may dalang armas ang mga sangkot, nagpasya silang paandarin ang jeep.

Dalawang senior citizen ang nagtangkang protektahan ang mga pasahero subalit pinagtatadyakan at pinagsusuntok ng suspek. Isa sa kanila ang nagtamo ng matinding pinsala at isinugod sa Asian Hospital.

Nilinaw rin ng saksi na walang pagkukulang ang matandang driver ng jeep, na tinatayang nasa edad 70 hanggang 80, dahil siya man ay nalagay sa panganib at ginawa ang kanyang makakaya upang mailayo sa kapahamakan ang mga pasahero.