Ateneo player na si Rene Baterbonia inilibing na
MANILA, Philippines — Inihatid na kahapon sa kaniyang huling hantungan si Ateneo cager Rene Clert “Bobet” Baterbonia sa sementeryo ng kanilang bayan sa Talacogon, Agusan del Sur.
Ang burial rites para kay Baterbonia, Mr.Most Valuable Player (MVP) ng Ateneo Davao ay sinimulan sa funeral mass sa Talacogon Municipal Gymnasium na dinaluhan ng mga miyembro ng kanilang pamilya, kaibigan, at mga supporters na nagpugay sa labi nito bago inihatid sa kaniyang huling hantungan.
Dumalo rin si Senador Robin Padilla, kapatid nitong si BB Gandang Hari na nakiramay sa pighati ng naulilang pamilya ni Baterbonia.
Isang simpleng programa rin ang idinaos kung saan nagbigay ng huling sulyap kay Rene ang pamilya nito, mga kaibigan, at mga supporters para sa batang student athlete.
Ang libing ni Rene, 18-anyos ay binalot ng matinding emosyon partikular na sa huling mensahe ng ina nito na si Rovelyn.
Hindi napigilan ni Rovelyn ang muling mapaluha sa taos puso nitong pasasalamat sa lahat ng nagmamahal sa kaniyang anak na si Bobet sa panahon ng pagdadalamhati ng pamilya nito sa kaniyang maagang pagpanaw.
Si Baterbonia ay inilibing bandang alas-11:00 ng tanghali sa bagong gawang Talacogon Municipal Memorial Park kung saan ito ang unang inihatid sa nasabing himlayan.
Magugunita na si Baterbonia at si Divine Adili, 21-anyos na Nigerian ay nalunod sa team building ng Ateneo Blue Eagles sa Dipaculao, Aurora noong Hunyo 8 ng taong ito.
- Latest
