SHAABAA Season 29: Batch 1996 mikumpleto sa Division A semifinalists

CEBU, Philippines — Ang Big Three Pizza Batch 1996 mipalagpot sa Batch 2002, 88-74, aron angkonon ang katapusang luna sa Final Four sa Division A sa Sacred Heart Ateneo Alumni Basketball Athletic Association (SHAABAA) Season 29 sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, siyudad sa Mandaue.

Si Roderick Mangubat mipaulbo og 36 puntos uban ang tulo ka rebounds ug tulo ka assists samtang si Serg Go Bui hapit moposte og triple-double uban ang 12 puntos, 15 ka rebounds, walo ka assists, ug upat nka steals alang sa Batch 1996.

Ang Batch 2002 maoy mi-iskor sa nag-unang kuwatro puntos sa duwa apan ang Batch 1996 mi-rally aron ilogon ang labaw, 22-21, sa hingpit human sa unang kuwarter.

Ang Batch 1996 miinat sa ilang bentaha ngadto sa 45-35 sa halftime sa wala pa kini miburot ngadto sa 23 puntos, 86-63, sa naghinapos nga bahin sa tinagakay nga sangka.

Si Andrew Po midugang og 12 puntos, lima ka rebounds, usa ka assist, duha ka steals, ug usa ka block alang sa Batch 1996, nga makigharong batok sa top seed nga Cebu Landmasters Batch 2003 sa best-of-three semifinals sugod karong Hunyo 28.

Si Ryan Li maoy nangu sa Batch 2002 uban ang 18 puntos, pito ka rebounds, lima ka assists, ug duha ka steals. Si Mark Anthony Ynoc mitali og 13 puntos ug upat ka rebounds samtang si Edmund Gaisano mihipos og 12 puntos, upat ka rebounds, upat nka assists, ug usa ka steal sa pildirong kawsa.