Mga batan-on mikuha og atensiyon

CEBU, Philippines — Ang mga batan-ong players misidlak nga labing hayag sa bag-ohay pang natapos nga PBA Commissioner’s Cup.

Sila si Jerrick Ahanmisi ug Sedrick Barefield miduyog ni Best Player of the Conference RJ Abarrientos isip mga top local performers ning mid-season nga komperensiya diin ang Barangay Ginebra milugwa nga kampiyon.

Sa labing uwahing statistika nga gipagawas sa liga, sila si Ahanmisi ug Barefield ang nag-una sa pinuntosay. Nagsunod kanila sila si Abarrientos, Damian Chong Qui, ug Robert Bolick.

Si Ahanmisi, nga karon sakop na sa San Miguel Beer, mi-average og 21.5 puntos sa miaging komperesnsiya sa dihang nagduwa pa siya uban sa Terrafirma

Ang sophomore guard sa Blackwater nga si Barefield sikit nga nagsunod ni Ahanmisi uban ang 21.08 puntos ug dayon si Abarrientos sa Ginebra uban ang 19.96 puntos. Si Chong Qui sa guest team Macau Black Knights nahimutang sa ikaupat nga puwesto uban ang 19.83 puntos samtang si Bolick, kanhi scoring champion gikan sa NLEX, ikalima bitbit ang 19.79 puntos.

Gawas nga nindot og salida sa pinuntosay, si Abarrientos mao sab ang 3-point king sa torneyo diin siya milansang og 77 ka tres, samtang si Bolick nag-una sa assists uban ang 8.21 ka assists matag duwa ug mipasud sa labing daghan nga free throws nga miabot og 74.

Mihimo sab hinoon og kasikas ang mga beterano nga sila si Ian Sangalang sa Magnolia ug June Mar Fajardo sa San Miguel.

Si Sangalang ang labing nindot og field goal shooting sa 66.15 porsiyento niyang tirada samtang si Fajardo nagpabiling hari sa rebounding uban ang average nga 14.54 ka rebounds matag duwa.

Si Joshua Munzon sa Titan Ultra nanghawod sa steals (2.92 spg) ug si Zavier Lucero sa Magnolia sa blocks (2.0, bpg)

Si Jordan Heading sa TNT ang labing hait sa free-throw, si Bong Quinto sa Meralco sa 4-point ug ang teammate niining si Chris Newsome sa 3-point shooting.

Bisan og nanamilit sa semifinals kay na-injured, si TNT import Bol Bol maoy nangu sa tanang imports sa pinuntosay uban ang 35.88 puntos matag duwa.