‘Francisco’ papasok ngayong Sabado
MANILA, Philippines — Isang tropical depression na nasa labas ng Philippine Area of Responsibility (PAR) ang inaasahang pumasok sa bansa ngayong Sabado ng gabi, June 20 o Linggo ng umaga, June 21.
Oras na pumasok sa PAR ay tatawaging bagyong Francisco.
Alas-10 ng umaga kahapon, ang bagyo ay namataan ng Pagasa sa layong 1,850 kilometro silangan ng Eastern Visayas taglay ang lakas ng hangin na umaabot sa 55 km per hour at pagbugso na umaabot sa 70 kph.
Ang naturang bagyo ay bahagyang lumakas at kumikilos pakanluran sa bilis na 20 kph sa may Philippine Sea sa kanluran ng Guam.
Tinaya naman ng Pagasa na oras na pumasok sa PAR ang bagyo, hindi ito magla-landfall at walang direktang epekto sa bansa sa susunod na tatlong araw.
Pinayuhan ng Pagasa ang publiko na palagiang maging handa at alisto para makaiwas sa epekto ng kalamidad.
- Latest
