Hepe sa TCPS gireklamo ni Byron

CEBU, Philippines — Midangop sa Commission on Human Rights (CHR) si kanhi Capitol consultant Byron F. Garcia aron ipa-imbestigar ang iyang gihulagway nga pag-maltrato kaniya samtang siya sa kustodiya sa kapulisan human sa iyang pag-aresto niadtong Hunyo 11.

Si Garcia, 65 anyos, mipasaka og administratibong reklamo batok kang Police Lieutenant Colonel Homobuno Sayon ug ubang wala pa mailhing mga pulis, tungod sa giingong paglapas sa iyang katungod isip senior citizen ug usa ka tawo nga adunay medikal nga kondisyon.

Ang maong reklamo may kalabotan sa pagdakop sa  iya diha Talisay City Fish Port sa Barangay San Roque, Talisay City, tungod sa mga kaso nga gi-file batok kaniya ubos sa Safe Spaces Act o Gender-Based Sexual Harassment Act. Ang mga kaso gisang-at ni Dr. Elisse Nicole Catalan, anak ni Cebu Governor Pamela Baricuatro, nga nag-akusar kang Garcia sa giingong pag-post og malaw-ay ug makapaubos sa dignidad nga mga pamahayag batok niya diha sa social media.

Atol sa usa ka press conference niadtong Biyernes, gisaysay ni Garcia ang iyang nasinati  sugod sa pag-aresto hangtod sa iyang pagpabilin sulod sa police detention facility.

Matud niya, mokabat sa 30 ka mga operatiba ang miadto aron modakop kaniya. Niingon usab siya nga nag-antos siya sa gout tungod sa uric acid crystals ug hubag ang iyang tuo nga kamot sa dihang gidakop siya.

“Nihangyo ko nga dili huoton ang cuffs kay hubag akong kamot,” matud pa ni Garcia.

Human sa iyang pagdakop, gidala siya sa detention facility sa Talisay City ug dayon gidala sa Talisay District Hospital alang sa medical examination. Didto, matud niya, nakita nga misaka ang iyang blood sugar.

“Na-stress ko kay wa man ko kalibutan ani nga kaso. So my blood sugar really went up,” iyang pahayag.

Giasoy usab ni Garcia nga una siyang gibutang sa usa ka bodega sulod sa police compound diin adunay mga spare uniforms ug ubang gamit sa kapulisan.

Gibutangan lamang kini og folding bed ug electric fan aron iyang kapuy-an.

Apan, sumala kaniya, wala madugay gibalhin siya ngadto sa regular detention cell uban sa ubang mga piniriso human adunay giingong reklamo nga nakadawat siya og espesyal nga pagtratar.

“Sa ako man gud nga kondisyon, dapat naa man koy special protection gikan sa custodial police,” matud pa niya.

Gireklamo usab ni Garcia nga wala siya maka-inject sa iyang insulin ug uban pang tambal human kini mabilin sulod sa bodega nga nakandado.

Matud niya, mikabat sa tulo ka oras nga wala siya makatumar sa iyang tambal bisan og taas na ang iyang blood sugar.

Tungod niini, niingon si Garcia nga misaka ang iyang blood sugar ngadto sa 327, hinungdan nga girekomendar sa mga doktor ang iyang pagbalhin ngadto sa Vicente Sotto Memorial Medical Center (VSMMC) alang sa dugang pagtambal.

Gawas sa iyang personal nga reklamo, nanawagan usab si Garcia nga masusi ug matul-id ang kahimtang sa mga detention facility.

Matud niya, daghan pang mga piniriso unya ang makasinati sa nahitabo niya ilabi na kadtong adunay mga sakit ug espesyal nga panginahanglanon.

Samtang nagpadayon ang imbestigasyon sa iyang reklamo sa CHR, gitakdang atubangon ni Garcia ang iyang arraignment ug pre-trial conference sa Hulyo 29, 2026, may kalabotan sa mga kaso nga gisang-at batok kaniya.

Hangtud ning pagsulat sa balita, nagpabiling tak-om ang baba sa kapolisan. IBM BANAT NEWS