Salisi nga modus nakabiktima sa mercado

CEBU, Philippines — Usa ka tindahan ang nabiktima sa salisi nga modus diha sa merkado publiko sa Barangay Centro sa Mandaue City niadtong Domingo sa gabii.

Sa report sa News 5 Visayas, ang biktima miingon nga nipalit ang us aka babaye sa iyang og mantika. Nibayad ni sa iya og P1,000 nga iyaha pud gisuklian.

Apan pagtunol niya sa mantika didto sa babaye niingon ni nga mantika sa baboy maoy iyang gustong paliton.

Tungod kay wala man silay baligya anang mantika sa baboy, giuli sa tindera ang gibayad sa suspek nga usa ka libo.

Ug giuli sab sa suspek ang sukli samtang nagsige og kuti-kuti og pangutana sa tindera.

Wala nabantayan sa tindera nga gibulsa na diay sa suspek ang giuli nga usa ka libo ug pagkahuman gipaninglan gihapon pag-usab ang tindera sa gibayad niya nga usa ka libo.

Tungod sa pagsige’g pangutana sa suspek kun asa makapalit og mantika sa baboy, nalipat na ang tindera sa iyang gipangsukli ug wala na siya nakahinumdom nga gihatag na niya balik ang usa ka libo.

Ang suspek nipakita og P100 nga mao ra daw giuli sa tindera. Samtang nagsige pa og hunahuna og maayo ang tindera bahin sa iyang natunol nga kwarta, nagpunay sad og siri-siri ang suspek nga pangayoon balik ang iyang usa ka libo kay nagdali siya para makapalit og bugas.

Tungod ani, gihatagan nalang og laing us aka libo sa tindera ang suspek nga dali-dali sab dayung nilakaw.

Gumikan kay nagduda gyud ang tindera ug wala nahimutang bahin sa usa ka libo, gipasubay niya ang CCTV sa ilang tindahan ug diha na niya nabantayan nga nailad gyud siya.

Gitabangan sa News5 ang tindera pag-report sa kapolisan bahin sa nahitabo, nasayran nga dili lang diay nakabiktima ang suspek kondili sa Cebu City ug Lapu-Lapu City pud.

Giawhag karon ang mga negosyante ug tindera nga magmatngon ani nga modus.-- IBM