SHAABAA Season 29: Batch 2012, 2010 miabante sa Division B Final Four

CEBU, Philippines — Ang defending champion Harley Davidson Batch 2012 ug Hatch IT Solutions Batch 2010 mitagak sa tagsa-tagsa nila ka mga karibal aron pag-angkon og luna sa Final Four sa Division B sa Sacred Heart Ateneo Alumni Basketball Athletic Association (SHAABAA) Season 29 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.

Si Kendrick Siao mirehistro og double-double nga 20 puntos ug 11 ka rebounds samtang si Aaron Baldwin Sing midugang og 18 puntos, tulo ka rebounds, lima ka assists ug tulo ka steals aron pangulohan ang Batch 2012 ngadto sa 75-55 nga paglampornas sa Batch 2006.

Miamot si Kyle Matthew Dumon og 10 puntos, walo ka rebounds, ug lima ka assists samtang sila si Simon Guanzon ug Dave Wilson Yu nagkumboya'g 15 puntos, 14 ka rebounds, ug siyam ka assists alang sa dominanteng Batch 2012, nga sa usa ka higayon milabaw og 30 points, 75-45,  sa tunga-tungang bahin sa katapusang kuwarter.

Si Chase Cokaling maoy nangu sa Batch 2006 uban ang 16 puntos ug duha ka rebounds. Sila si Niel Benedicto ug Mark Blanco parehong mi-iskor og 15 samtang nagkumbinar sab sila og 19 ka rebounds, pito ka assists, ug lima ka steaks sa way kapuslanan kay natuldokan na nilang ang season.

Sa laing resulta, ang Batch 2010 milabni sab og puwesto sa semifinals human gipalagpot ang Insular Square Batch 2005, 81-61.

Si Gabe Branzuela maoy mibandera sa Batch 2010 ngadto sa 20 puntos nilang demolisyon sa Batch 2005 uban ang  32 puntos, lima ka rebounds, ug siyam ka assists.

Nakakuha siya og dakong suporta gikan ni Jasper Diaz, nga mikulit og impresibong double-double nga 20 puntos ug 27 ka rebounds nga iyang gisukipan og tulo ka assists, lima ka steals, ug duha ka blocks. Nagparamdam sab si Charles Divinagracia sa iyang presensiya sa Batch 2010 bitbit ang 14 puntos, duha ka rebounds, duha ka assists, ug usa ka steal.

Si Elddie Cabahug mipabuto og 24 puntos uban ang siyam ka rebounds, tulo ka assists, ug duha ka two steals samtang si Aaron Uy mikolekta og 17 puntos, walo ka rebounds ug duha ka assists apan nakawang ang ilang paningkamot kay nanamilit na ang Batch 2005 sa torneyo.

Sa semis, ang Batch 2010 makigharong sa '04 For The Win Batch 2004 samtang ang Batch 2012 makigsangka sa Nest Workspaces Batch 2013.