Hackers ng Senate at Kongreso, tukoy na

MANILA, Philippines — Iisang grupo lang umano ang nasa likod ng pag-hack at pag-deface sa mga website ng Senado, Kamara de Representantes at National Bureau of Investigation (NBI).

Ito ang sinabi ni NBI Director Melvin Matibag nitong Lunes kung saan ang mga suspek ay sangkot sa magkakahiwalay na cyberattacks na tumama sa mga website ng Senado, Kamara, at NBI noong nakaraang weekend.

Tumanggi muna si Matibag na ibunyag ang pagkakakilanlan ng mga nasa likod ng cyberattacks habang nagpapatuloy ang imbestigasyon.

Nilinaw naman ng ahensiya na walang sensitibong datos na naapektuhan sa mga insidente ng website defacement.

Samantala, sinabi ni Cybercrime Investigation and Coordinating Center (CICC) Director Renato Paraiso na maaaring managot ang mga responsable sa mga kasong may kaugnayan sa computer manipulation at malicious mischief.

Magtutulungan ang NBI at CICC sa imbestigasyon kasunod ng paglagda ng Memorandum of Agreement na naglalayong palakasin ang pagtugon sa mga insidente ng cyberattacks at iba pang pag-atake sa mga website ng pamahalaan.