5 bagong Junior Lady Altas ipinakilala

MANILA, Philippines — Limang bagong recruit ng University of Perpetual Help System DALTA ang magpapalakas sa pagdedepensa ng Junior Lady Altas sa korona ng darating na NCAA Season 102 girls volleyball tournament.

Kabilang sa mga ipinakilala ni head coach Sandy Rieta ay sina 5-foot-8 Georgina Trista Abaricia, 5’8 Ma. Nicaella Villeza, 5’8 Joyce Manalungsung, 5’3 Adriele Jayne Bautista at 5’1 Shiena Cate Vargas.

Ang 13-anyos na si Abaricia ay nagmula sa Enverga University sa Lucban Quezon, habang ang 14-anyos na si Villeza ay galing sa Josiah Christian Values School sa Imus City, Cavite.

Naglaro naman ang 17-anyos na si Manalungsung sa Benigno S. Aquino National High School sa Concepcion, Tarlac at ang 16-anyos na si Bautista ng Imus, Cavite ay mula Philippine Christian University-Dasmariñas.

Ang 17-anyos na si Vargas ay sumalang sa St. Jude School sa General Trias, Cavite.

Kumpiyansa si Rieta na makakatulong ang mga bago niyang recruits sa title defense ng Junior Lady Altas.

Kasama na sila sa training nina holdovers Sherrie Rose Acosta, Elizha Sildo, Michaela Boticario, Ashley Deanon, Lut Bacalla, Joycelle Casil, Rhian Corpuz, Chrisline Ajid at Arianne Casillan.