Byron Garcia mopiyansa karong adlawa

CEBU, Philippines — Gipaabot nga mopiyansa si kanhi consultant sa Kapitolyo nga si Byron Fiel Garcia karong adlawa, Hunyo 13, samtang nagpadayon ang mga kasong kriminal nga iyang giatubang nga gender-based online sexual harassment.

Sumala pa sa kapolisan sa Talisay City Police Station, nangandam na ang abogado ni  Garcia sa pagpiyansa para sa iyang temporaryong kagawasan human siya gidakop niadtong Huwebes sa hapon.

Bisag makapiyansa pa siya karong adlawa, magpadayun gihapon ang iyang kaso nga gikatakdang i-arraign ug pre-trial conference sa Hulyo 29, 2026.

Ang maong pagdungog himuon sa Municipal Trial Court in Cities (MTCC) Branch 1 sa dakbayan sa Mandaue ubos sa pagdumala ni Presiding Judge Jennifer Pepito-Nimaniwa.

Base sa rekord sa korte, adunay tulo ka kasong giatubang si Garcia nga may kalabotan sa giingong paglapas sa Section 12 sa Republic Act 11313 o ang Safe Spaces Act o sexual harassment.

Gitakda sa korte ang piyansa nga P36,000 matag kaso, busa mokabat og P108,000 ang kinatibuk-ang kantidad nga iyang kinahanglang bayran aron temporaryong makagawas..

Ang kaso nagagikan sa reklamo nga gisang-at ni Capitol Public Health consultant Dr. Elisse Nicole Catalan, kinsa niakusar kang Garcia nga kanunay’ng nagpatik og mga pamahayag ug video sa social media nga nagpakaulaw kaniya.

Sa resolusyon sa piskalya, giingong ang mga post og video ni Garcia adunay mga pulong nga maisip nga sexist, misogynistic, body-shaming nga makapakaulaw sa complainant.

Una nang gibasura ang maong mga kaso tungod sa mga isyu sa hurisdiksyon, apan misang-at og motion for reconsideration ang Office of the City Prosecutor aron mabali ang maong desisyon.

Human sa bag-ong pagtan-aw sa impormasyon, mga ebidensiya ug argumento sa prosekusyon, nakita sa korte nga adunay igong basihan aron ipadayon ang mga kaso.

“Accordingly, after a re-evaluation of the Information and supporting evidence together with the resolution of the prosecution and the Motion for Reconsideration, the court finds that probable cause exists to hold the accused for trial of the cases at bar,” matud pa sa order sa korte.

Tungod niini, gimando sa korte ang pag-isyu sa warrant of arrest batok kang Garcia ug gitakda usab ang petsa sa arraignment ug pre-trial proceedings.

Sa laing resolusyon sa prosekusyon, giingong adunay igong ebidensiya aron mapasakaan si Garcia og tulo ka kaso sa paglapas sa Safe Spaces Act.

Lakip sa mga ebidensiyang gituki sa mga piskal mao ang screenshots sa mga post, mga digital copies sa online content ug dokumentasyon gikan sa National Bureau of Investigation (NBI) nga nagpakita sa preserbasyon sa maong mga materyales.

Ang prosekusyon  miingon nga “the constitutional protection of speech is not absolute,” ug giingong ang mga pahayag nga giisip nga sexist ug makapahasol sa usa ka pribadong indibidwal kalapasan kini ubos sa Republic Act 11313. — IBM BANAT NEWS