CCPO pabiling komitado sa pagmentinar sa kahapsay ug kalinaw

CEBU, Philippines — Gisaulog sa Cebu City Police Office (CCPO) ang ika-128 nga Independence Day kagahapon kauban ang kagamhanan sa Dakbayan sa Sugbo, ubang ahensiya sa gobiyerno, uniformed services ug stakeholders sa siyudad.

Atol sa pakigpulong, ang CCPO nagkanayon nga nagpabilin ang ilang commitment sa pagmentinar sa kalinaw ug kahapsay, pagsunod sa balaod ug pagpanalipod sa katungod ug kagawasan sa publiko.

Matud sa CCPO nga ang maong selebrasyon usa ka pahinumdom sa responsibilidad sa matag Filipino sa pagpanalipod sa kagawasan pinaagi sa serbisyo publiko ug kooperasyon sa komunidad.

Ang selebrasyon nga adunay temang “Kalayaan 2026: Kalayaan. Kinabukasan. Kasaysayan”, nagsugod sa flag-raising ceremony ug gisunod ang mga kalihokan sa nahisgutang kasaulogan diha sa CCPO headquarters sa Camp Sotero Cabahug, Gorordo Avenue niining siyudad Cebu City isip simbolo sa panaghiusa sa tibuok nasud.

Niapil usab ang CCPO personnel sa mga programa nga naghatag og gibug-aton sa kahulogan sa kasaysayan sa kagawasan sa Pilipinas ug sa mga prinsipyo sa panaghiusa, serbisyo ug civic responsibility.

Gidasig sa CCPO ang pagtinabangay sa mga ahensiya sa gobiyerno ug sa katawhan aron masuportahan ang mga programa sa nasudnong kalamboan paingon sa mas luwas ug mas progresibong Pilipinas.

Sa laing bahin, si Presidente Ferdinand Marcos, Jr. sa iyang Independence Day speech kagahapon nanawagan sa mga Filipino nga “protect truth from distortion” samtang iyang gipahinumdom nga lahi na ang klase sa mga hagit nga giatubang sa nasud karon kompara sa panahon sa mga rebolusyonaryo.

 “We must protect truth from distortion, harness technology wisely, and restore trust in a time increasingly marked by division and distrust”, matud ni Marcos.

Gilakbit usab sa presidente nga ang kagawasan dili lang kabilin sa nangagi apan responsibilidad nga angay barugan sa matag henerasyon ug iyang gihatagan og pasidungog ang mga bayani nga nagtukod ug nagpalig-on sa Republika sa Pilipinas. — BDB  BANAT NEWS