‘Wag mapagod ipaglaban ang Pinas – Marcos
MANILA, Philippines — Nanawagan si Pangulong Ferdinand Marcos Jr. sa mga Pilipino na huwag mapagod na mahalin, piliin at ipaglaban ang Pilipinas.
Inihayag ito ng Pangulo sa ika-128 Proklamasyon ng Araw ng Kalayaan at pag-aalay ng bulaklak sa bantayog ni Jose Rizal sa Luneta, Maynila.
“Sa bawat Pilipino, ito ang aking panawagan: Huwag po tayong mapagod na mahalin, piliin, at ipaglaban ang Pilipinas,” pahayag pa ni Marcos.
Paalala pa ng Pangulo sa bawat Pilipino na palalimin ang kamalayan at maging mapanuri sa katotohanan at gamitin din sa tama ang ating kakayahan at hindi sa kasamaan.
Lumaban din aniya nang patas sa araw-araw at huwag pagsamantalahan ang pinagpaguran ng iba at piliin natin ang ikabubuti ng bayan laban sa interes ng iilan.
Paalala pa ni Marcos na dapat gawing inspirasyon ang mga bayani na siyang nagturo sa atin ng pagkakaisa para makamit ang kasarinlan at nagturo na tunay na pinuno ay nagsasakripsyo ng sariling interes para sa ikabubuti ng bayan.
“Kung mananatili tayong tapat sa mga adhikaing ito, makatitiyak tayong magmamana ang mga susunod na henerasyon ng isang bansa na mas matatag, mas makatarungan, at mas maunlad,” pahayag pa ni Marcos.
Iginiit pa ng Pangulo na sa kabila ng mga hamon sa ating kalayaan at kaunlaran ay nandiyan pa rin ang mga katiwalian, pagkakanya-kanya at kahirapan, pandaigdigang kaganapan at banta ng climate change ay nananatili ang pag- asa sariling interes para galing, sipag at kabutihan ng mga Pilipino.
- Latest
