Resort sa Dipaculao, ipinasara

Sa pagkalunod ng Ateneo players

MANILA, Philippines — Pansamantalang ipinasara ng Pamahalaang Bayan ng Dipaculao ang Hermanos Leisure and Farm Resort kasunod ng pagkasawi nina Ateneo players Rene Clert Baterbonia at Divine Adili nitong Hunyo 8.

Ang closure order ay inutos ni Mayor Danilo Tolentino matapos ang pagsusuri ng isang composite team mula sa Business Permits and Licensing Office (BPLO), Municipal Tourism Office (MTO), Municipal Disaster Risk Reduction and Management Office (MDRRMO), at Philippine Coast Guard (PCG).

Lumilitaw na hindi sumusunod ang resort sa ilang probisyon ng ordinansa na “An Ordinance Promoting Safety in Seashores and Other Bodies of Water, Including Tourist Destinations, within the Jurisdiction of the Municipality of Dipaculao, Aurora.”

Ayon kay Municipal tourism officer Leticia Combis, napansin nilang nasa loob ng resort’s room ang mga house rules  at wala sa labas.

“Actually, wala kaming nakitang­ ­signages sa labas ng resort kundi may mga house rules sila sa loob ng kuwarto. Ang kulang lang ‘yong mga hotline kasi lahat ng hotel ay binibigyan namin ng hotline ng MDRRMO, pulis, sa tourism, gano’n po. ‘Yon po ang wala,”  ani Combis.

Samantala, isasailalim din sa forensic examination and digital video recorder (DVR) na kuha ng resort na tinuluyan ng student-athletes upang makatulong sa imbestigasyon. “It is too early to determine the value of the ­footage in the ongoing investigation as this will depend on the result of the forensic examination,“ ani PMaj. Lorena Bautista, spokesperson ng Aurora Police.

Una nang pinawi ng mga awtoridad ang anggulo ng foul play sa pagkamatay ni Baterbonia at Adili habang wala rin umanong pabigat na anumang bagay na nakita sa katawan ng mga ito.

Si Baterbonia ay namatay sa asphyxia base sa resulta ng awtopsiya sa labi nito habang nais din ng pamilya ni Adili na maisailalim na muna ito sa awtopsiya bago ibiyahe ang bangkay ng kanilang anak pabalik sa kanilang bansa sa Nigeria.

Kaugnay nito, nasa Ateneo de Davao Senior High School na ang labi ni Baterbonia para sa public viewing. Dito nag-aral at gumawa ng pangalan sa larong basketball si Baterbonia.