“Festivals of festivals” posibleng ipahigayon sa probinsiya

CEBU, Philippines — Bisan mipahibalo si Governor Pamela Baricuatro nga dili na ipadayon sa iyang administrasyon ang Pasigarbo sa Sugbo, posible nga mobalik kini nga selebrasyon nga mas simple ug dili kaayo magasto.

Sa press briefing kagahapon, giingon ni Baricuatro nga nagsugod na ang mga panaghisgot uban sa provincial planning team alang sa posibleng pagpahigayon sa usa ka “Festival of Festivals” nga magtapok sa mga festival contingent gikan sa nagkadaiyang lungsod ug dakbayan sa Cebu.

Matod sa gobernador, andam siyang mosuporta sa maong kalihokan kung madayon ang plano.

“Para sa Festival of Festivals, nagsugod na ta og istorya sa atong planning team. Most likely I will support it,” matod niya.

Gipasabot ni Baricuatro nga tumong sa maong kalihokan ang pagpalig-on sa kultura ug kabilin sa Sugbo samtang hatagan og higayon ang mga lokal nga artista nga mapakita ang ilang talento.

“It's also to encourage sa atong heritage ug sa atong creatives nga atong ma-showcase, pero kinahanglan nga ubos ra ang gasto,” dugang niya.

Matod pa sa gobernador, halos tanang local government unit (LGU) sa lalawigan adunay kaugalingong festival, busa mas sayon nga tipunon kini sa usa ka dakong showcase sa probinsiya.

Giingon usab niya nga mahimong gamiton ang maong kalihokan isip paagi sa pagpili sa opisyal nga representante sa Cebu Province alang sa Sinulog Festival.

Sumala sa gobernador, wala pa matino ang opisyal nga ngalan ug pinal nga porma sa kalihokan tungod kay padayon pa ang mga diskusyon.

Bisan pa niini, iyang gipadayag nga posible kining mapahigayon na sa umaabot nga pagsaulog sa Charter Day o Founding Anniversary sa Probinsya sa buwan sa Agosto.

Matod niya, dili na kinahanglan og dagkong pagpangandam tungod kay andam na ang kadaghanang contingent, performers ug festival presentations sa matag LGU.

Ang Pasigarbo sa Sugbo, nga gisugdan sa administrasyon ni Garcia, nailhan isip usa sa labing dagkong cultural events sa lalawigan diin nagtapok ang mga lungsod ug dakbayan aron magpasundayag sa ilang street dancing, cultural presentations ug makabungog nga mga costume.

Base sa rekord sa Provincial Government, kapin sa P55 milyon ang gipagawas nga cash prizes ngadto sa mga nakadaog nga contingents sa Pasigarbo 2024.

Gawas niini, kapin sa P200 milyon usab ang gigahin alang sa preparasyon ug subsidiya sa kalihokan, lakip ang dul-an P150 milyon nga ayuda ngadto sa mga partisipanteng LGU.

Ang mga lungsod sa mainland nakadawat og P3 milyon matag usa, samtang P3.5 milyon ang nadawat sa matag island municipality alang sa ilang pagpangandam. (BANAT NEWS)