Napakyas pagsustento sa iyang pamilya gidakop

CEBU, Philippines — Usa ka 66-anyos nga lalaki ang nadakpan sa Borbon, Cebu niadtong Hunyo 9, 2026 human gi-isyu ang warrant of arrest batok kaniya may kalabotan sa kapakyas sa pagsustento sa iyang legal nga pamilya ubos sa Republic Act No. 9262.

Ang kaso nasakop ubos sa Republic Act No. 9262 o Anti-Violence Against Women and Their Children Act, nga naglatid sa kapakyasan pagsustento isip usa ka porma sa economic abuse.

Ang suspek nadakpan sa joint intelligence-driven operation nga gipahigayon sa Tracker Team sa Sogod Municipal Police Station, uban sa Siquijor Municipal Police Station ug Cebu Provincial Intelligence Team sa Regional Intelligence Unit 7 (RIU-7).

Sumala sa kapolisan, ang pagdakop mibase sa warrant of arrest nga giisyu sa Presiding Judge sa Family Court, First Judicial Region, sa Dagupan City, Pangasinan niadtong Hunyo 5, 2026.

Giingon sa imbestigasyon nga napakyas ang suspek sa paghatag og igong pinansyal nga suporta sa iyang legal nga pamilya, nga giila nga “economic abuse”. Wala gibutyag sa kapolisan ang pagkatawo sa suspek ug sa iyang legal nga pamilya. Kabahin ang maong operasyon sa padayon nga kampanya sa Philippine National Police batok sa mga wanted persons aron masiguro nga madala sa korte ang mga nag-atubang og kaso.

Gidayeg sa Cebu Police Provincial Office ang hiniusang paglihok sa mga operatiba ug mipasalig nga padayon nilang palig-onon ang manhunt operations ug inter-agency cooperation. (BANAT NEWS)