Enrollees sa Central Visayas kuwang pa ang gidaghanon

CEBU, Philippines — Gibutyag sa Department of Education (DepEd)-7 nga adunay kasamtangang gikulangon sa ilang gilaoman nga gidaghanon sa estudyanteng nagpa-enroll sa pagsugod sa school year 2026-2027 apan nagpabiling positibo ang ahensiya nga maabot sa gilaomang ihap ang enrollees sa Central Visayas samtang padayon ang pag-update sa datos ug pagdawat sa mga late enrollees.

Atol sa pre-assessment press conference sa DepEd-7 niadtong Hunyo 8, 2026, nagkanayon si Amaryllis Villarmia, regional information officer sa DepEd-7 nga gilaoman sa ahensiya nga moabot sa kapin o mokabat sa 1.6 milyon ang gidaghanon sa mga estudyante sa Central Visayas karong tuiga sama sa ihap sa enrollees niadtong niaging school year.

Ang kasamtangang datos gikan sa online reporting system sa DepEd-7 adunay inisyal nga ihap nga nikabat ngadto sa 1.3 milyon ka estudyante ang nagpa-enroll.

 Apan nagpadayon pa ang pag-update sa mga numero gikan sa mga schools division offices ug mga eskwelahan ilabina gikan sa mga lugar nga hinay ang internet connection diin mahimo pa nga mapun-an ang ihap sa mga estudyante karong tuiga.

Bisan wala pa makaabot sa gilaomang gidaghanon ang enrollees positibo ang inisyal nga bana-bana sa DepEd-7 sa kahimtang sa mga pampublikong eskwelahan sa rehiyon.  Usa sa dakong hinungdan niini mao ang malampusong pagpatuman sa Brigada Eskwela sa matag tunghaan sa rehiyon diin naandam ang mga pasilidad alang sa pag-abli sa klase.

Matud sa DepEd-7 nga andam usab ang mga panginahanglanon sa mga eskwelahan sama sa classroom, lingkuranan ug uban pa’ng gamit alang sa mga estudyante.

Dako usab ang pagtagad nga gihatag sa ahensiya sa mga tunghaan nga naapektohan sa linog, ilabina sa Bogo City Division aron masiguro ang hapsay ug luwas nga pagsugod sa klase.

Samtang nagsugod na ang klase, padayon gihapon ang pagpalista sa late enrollees.

Matud sa DepEd -7 nga bisan pa nga adunay early registration sukad pa sa Pebrero, naa gihapo’y mga ginikanan ug estudyante nga ulahi makapalista tungod sa lain-laing mga hinungdan.

Dugang ni Villarmia nga mahimo pa’ng modawat ang mga eskwelahan og late enrollees hangtud sa Hulyo aron makatuman sa requirements sa matag tunghaan nga kinahanglang makahuman og labing menos sa 80 porsiyento nga kinatibuk-ang school days sa maong school year. Rachel E. Wenceslao, CNU-Journalism intern/BDB BANAT NEWS