81 durugista nangadakpan
CEBU, Philippines — Niabot sa P1.08 ka milyon nga kantidad sa gidudahang shabu ang nasakmit sa Cebu Police Provincial Office (CPPO) sa unang semana sa Hunyo, subay sa ilang gipahigayong operasyon batok sa kriminalidad niadtong Hunyo 1 hangtod 7, 2026.
Gipahayag sa CPPO nga mas gipakusgan pa nila ang kampanya batok sa kriminalidad, lakip na ang ilegal nga drugas, ilegal nga sugal, ug mga dili lisensyadong armas.
Sa operasyon batok sa ilegal nga drugas, 81 ka mga indibidwal ang nasikop pinaagi sa 62 ka anti-drug operation.
Atol sa maong mga operasyon, nasakmit ang gibanabanang 159.91 ka gramo sa shabu nga nagkantidad og P1.08 milyones. Miabot usab sa 142 kasong kriminal ang gipasaka batok sa mga malapason.
Samtang, sa kampanya batok sa mga wanted person, nagmalampuson ang pagsilbi sa 46 ka warrant of arrest, nga miresulta sa pagsikop sa 41 ka mga pugante, diin 4 niini giisip nga Most Wanted Persons.
Sa kampanya batok sa loose firearms, adunay 34 ka operasyon ang gipahigayon diin nasakmit ang 19 ka armas, diin 17 ani ang gi surrender ug usa ka explosive.
Pinaagi sa gipahigayon nga Safer Cities Initiatives sa CPPO, niabot sa 1,533 ka operasyon ang gilusad nga miresulta sa pagsikop sa 2,809 ka mga malapason diin sila gipamulta, samtang 1,512 ang gipasidan-an.
Miabot sad sa P1.33 milyones ang kinatibuk-ang kantidad ang nakolekta gikan sa multa sa mga malapason.— Cheny R. Labrador ug Paul Benedict O. Sariana (BANAT NEWS)
- Latest
