Lalaki timbog sa baril at granada
MANILA, Philippines — Isang lalaki na wanted sa pagnanakaw ang natimbog ng pulisya matapos na salakayin ang kanyang hide out bunsod ng impormasyon na nagtatago ito ng baril at granada sa Taguig City, Sabado ng hapon.
Batay sa report na tinanggap ni Taguig City Police chief PCol. Julius Anonuevo, si alyas “Justine”, 26, ay dinakip alas-4:15 ng hapon ng Hunyo 6, 2026, sa isang impounding compound, sa Brgy. West Rembo, Taguig City.
Nag-ugat ang operasyon sa intelligence report hinggil sa pagbibitbit ng baril ng suspek na isinailalim sa casing at surveillance nang matunton ang kinaroroonan. Huli sa akto ang suspek na may kinakalikot na baril sa nasabing compound kaya agad siyang inaresto.
Bukod sa kalibre .38 na baril na kargado ng 3 bala, natuklasan din sa kanyang bag ang isang hand grenade.
Isinailalim na sa inquest proceedings ang suspek sa Taguig Prosecutor’s Office sa reklamong paglabag sa Republic Act 10591 (Comprehensive Firearms and Ammunition Regulation Act) at RA 9516 (Illegal Possession of Explosive).
- Latest
