Pangulong Marcos inaabangan ‘ikakanta’ ni Co

MANILA, Philippines — Handa si Pangulong Ferdinand Marcos Jr. na makinig sa anumang sasabihin ni dating Congressman Zaldy Co sa mga taong sangkot sa maanomalyang flood control projects.

Ito ang tugon ni Palace Press Officer Atty. Claire Castro, sa tanong kung ano ang naging reaksyon ng Pangulo matapos malaman na naaresto na si Co.

Ayon kay Castro, masaya si Pangulong Marcos na naaresto dahil isa si Co sa big fish sa flood control anomaly na naaresto na at mapapanagot sa batas.

“Definitely, dahil sabi nga po natin ang utos po niya, managot ang dapat na managot. Kung ang isang tao po ay may warrant of arrest, fugitive, cancelled ang passport – sino po ang hindi matutuwa na ang isang taong fugitive ay maibabalik sa Pilipinas para managot,” giit pa ni Castro.

Bagama’t nauna nang idinamay ng dating kongresista si Pangulong Marcos sa anomalya sa flood control scandal, tiwala naman si Castro na magsasabi si Co ng katotohanan at ibubunyag kung sino ang mga kasama sa flood control scam.

“Ang Pangulo, uulitin po natin, ang siyang nagsimulang magpaimbestiga ng maanomalyang flood control projects. Siya ang naunang magpaimbestiga ng diumanong korapsiyon,” ayon pa kay Castro.

Dahil dito handa aniya ang Pangulo na makinig sa lahat ng maaaring sabihin ng mga taong involved at dapat na managot sa batas.