Diesel sisirit sa P162.50/L sa Mayo

‘Most severe scenario’ - DEPDev

MANILA, Philippines — Nagbabala ang Department of Economy, Planning and Development (DEPDev) na ang inflation rate ay maa­aring tumaas sa double-digit na antas kung saan ang presyo ng diesel ay tataas ng 176% sa ilalim ng “pinakamalalang senaryo” at kung ang krudo ay aabot sa $200 kada bariles sa gitna ng krisis sa Gitnang Silangan.

Ipinakita ni Socioeconomic Planning Secretary Arsenio Balisacan ang ginawang pagsusuri ng DEPDev sa epekto sa ekonomiya ng giyera ng US-Iran-Israel sa isang pagdinig sa Senado nitong nakaraang Martes.

Ang presentasyon ni Balisacan sa Senado ay isang update sa posibleng “malalang ­senaryo” na tinalakay niya sa House dalawang linggo na ang nakalilipas.

Inilatag ng DEPDev ang limang puwedeng mangyari kung saan ang pinakamalala ay ang pang-limang scenario.

Sa ilalim ng Senaryo 5, kapag ang krudo ay umabot sa $200 kada bariles, tinantya ng DEPDev na ang presyo ng domestic diesel ay maaaring tumaas ng 160.05% pagsapit ng Abril sa P154.06 kada litro, kumpara sa baseline estimate na P59.24 kada litro.

Pagsapit ng Mayo, ang diesel ay maaaring tumaas ng 176.49% sa P162.60 kada litro kumpara sa baseline estimates bago ang labanan sa pagitan ng US at Israel at Iran.

Kahit na sa ilalim ng pinakasimpleng senaryo na $100 kada bariles ng krudo, inaasahang lalampas pa rin ang inflation rate sa komportableng kisame ng gobyerno na 2% hanggang 4%, kung saan ang average sa buong taon ay aabot sa 4% hanggang 4.2%.

Sa bawat senaryo, sinabi ni Balisacan na ang inflation ay inaasahang lalagpas sa target ng gobyerno na 2% hanggang 4%.