Torre, ipinasa na 4-star kay Nartatez  

MANILA, Philippines — Ipinasa na ni dating Philippine National Police (PNP) Chief General Nicolas Torre III na ngayo’y general manager ng Metropolitan Manila Development Authority (MMDA) ang kanyang 4-star rank kay PNP Acting Chief PLtGen. Jose Melencio Nartatez, Jr.

Sa press briefing sa Malakanyang, sinabi ni ­Palace Press Officer Undersecretary Atty. Claire Castro na nagkaroon lamang ng hindi pagkakaunawaan matapos sabihin ni Torre na hindi pa siya nagreretiro mula sa police service matapos na tanggapin ang  posisyon sa MMDA.

Ayon kay Castro, nakausap na niya si Torre at handa itong isalin ang kanyang 4-star rank kay Nartatez.

Dagdag pa niya, nanungkulan na si Torre bilang bagong GM ng MMDA at sa kanyang optional retirement ay matatanggap nito ang kanyang full benefits at iba pang benepisyo bilang full star general.

Una nang itinanggi ni Torre ang kanyang ­pagreretiro na inaprubahan ng National Police Commission (NAPOLCOM).

Ani Torre, ikinagulat niya ang pahayag ng NAPOLCOM na inaprubahan na ng ahensiya ang kanyang ‘optional retirement’ gayung wala naman umano siyang isinumiteng pagreretiro.

Ngunit ayon sa NAPOLCOM, ang panunumpa ni Torre bilang MMDA general manager noong Disyembre 26, ay maituturing na automatic resignation sa PNP.

Una na ring sinabi ni Interior Secretary Jonvic Remulla na personal niyang tinawagan si Torre sa pagpoproseso ng kanyang optional retirement.

Sa katunayan, plano niyang imbitahan si Torre sa donning ceremony ni Nartatez.