Impeachment vs Pangulong Marcos malabong lumusot sa Kamara
MANILA, Philippines — Malabo umanong magtagumpay sa Kamara ang pinaplanong ikasang impeachment laban kay Pangulong Ferdinand Marcos Jr.
Ayon kay National Unity Party (NUP) Party Chairman at Antipolo City Rep. Ronaldo Puno, walang matibay na ground para maghain ng impeachment laban sa Pangulo.
Ginawa ni Puno ang pahayag kaugnay ng pinaplano umano ng mga kritiko ng administrasyon na maghain ng impeachment laban kay PBBM ngayong 20th Congress.
“Actually I don’t see any grounds for filing an impeachment case against the President. Even when we started analyzing, we’re trying to think what grounds can they put for an impeachment case,” ani Puno na iginiit pang sa kasalukuyan ay wala naman silang nakikitang paglabag ni Pangulong Marcos sa Saligang Batas.
Kaugnay nito, tiniyak naman ni Puno na hindi susuportahan ng mga opisyal at miyembro ng NUP ang anumang impeachment na ihahain laban kay Pangulong Marcos.
Ayon naman sa sources, maraming kaalyado sa Kamara si Marcos kaya mahihirapang makalusot dito ang impeachment laban sa kaniya.
Sa proseso ng impeachment, nagsisimula ito sa Kamara na kailangang iindorso ng sinumang mambabatas bago ito dinggin sa panel at pagbotohan sa plenaryo. Sakaling makalusot at mapagtibay ito sa plenaryo, kung makakuha ng mayorya ng boto sa mga Kongresista ay saka ito dadalhin sa Senado.
- Latest
