Pangulong Marcos: Pinas hindi ‘ISIS training hotspot’!
MANILA, Philippines — Pinalagan ng Malakanyang ang pagsasalarawan sa Pilipinas ng ilang foreign media na isang “ISIS training hotspot” o “terror hotspot”.
Ito ay kasunod ng mga ulat na galing dito sa bansa ang mag-amang gunman sa Bondi Beach Massacre sa Australia bago ang ginawang mass shooting doon kung saan umaabot sa 15 katao ang nasawi.
Sinabi ni Palace Press officer Atty. Claire Castro, na kinontra ni Pangulong Ferdinand Marcos Jr. ang nasabing mga pahayag at inilarawan na isa itong “misleading characterization” ng Pilipinas bilang ISIS training hotspot.
Ayon kay Castro, base sa pahayag ng National Security Council (NSC), ay walang balidong ulat o kumpirmasyon na ang mag-amang namaril sa Bondi beach ay nag-training sa Pilipinas.
Sa kabila nito, patuloy aniyang biniberipika ng NSC ang nasabing mga impormasyon bagama’t walang anumang ebidensya ang magtuturo na ang Pilipinas ay ginagamit para sa terrorist training.
Simula aniya noong 2017 Marawi Siege, ay nalansag na ng mga otoridad ang ISIS-affiliated groups sa bansa at sinuportahan rin ito base sa assessments ng United Nations at US Government.
Sinabi pa ni Castro na inatasan na ni Pangulong Marcos ang Anti-Terrorism Council at iba pang mga otoridad sa bansa na maging mapagmatyag at maging alerto sa paligid laban sa anumang terror activities at patuloy na makipag-ugnayan sa iba pang kaalyadong bansa.
Umapela rin si Marcos sa mga dayuhang mamamahayag na maging mapanuri at responsable sa pagbabalita lalo na kung makakaapekto ang mga impormasyon nila sa integridad at imahe ng Pilipinas.
- Latest
