Kemikal sa embalsamo, nasa vape! - DOH
MANILA, Philippines — Ibinunyag ng Department of Health (DOH) na ang mga vapes ay nagtataglay rin ng formaldehyde na ginagamit sa pag-eembalsamo.
Sa isang abiso sa kanilang social media page, sinabi ng DOH na ang formaldehyde ay masama sa kalusugan ng tao dahil nakakapinsala ito sa lalamunan, ilong at mata.
Napatunayan na rin nilang carcinogenic ang formaldehyde o maaaring magdulot ng kanser.
“Ang formaldehyde ay isang kemikal na ginagamit sa pang-embalsamo, dahil disinfectant ito. Ngunit sa katawan, nakapipinsala ito ng lalamunan, ilong at mata. Napatunayan ding carcinogenic, o nagdudulot ng kanser ito kapag matagal ang exposure dito,” anang DOH.
Dagdag pa ng DOH, hindi lamang formaldehyde ang makikita sa vape, Kundi iba pang nakalalasong kemikal, gaya ng diacetyl, acrolein, cadmium at iba pa.
“Ang nakakatakot: hindi lang ito ang kemikal na nasa vape. Ang ibang mga nakalalasong kemikal tulad ng diacetyl, acrolein, cadmium at marami pang pinag-aaralang kemikal ay natagpuan na,” anang ahensiya.
Kasabay nito, nanawagan din naman ang DOH na suportahan ang buwis na nagpuprotekta sa kalusugan ng mga Pinoy.
Giit nito, ang bawat piso sa Sin Tax ay may katumbas na buhay na maaaring maligtas.
“Kaya hindi dapat abot-kaya ang mga kemikal na nakapipinsala sa kalusugan, lalo na ng kabataan. Suportahan ang buwis na poprotekta sa kalusugan ng mga Pilipino. Ang bawat piso ng Sin Tax ay may katumbas na buhay na naliligtas,” anito pa.
- Latest
