Korapsyon talamak, normal na sa pulitika

Ayon sa 97% ng Pinoy

MANILA, Philippines — Majority o 97% ng mga Pinoy ang naniniwalang malawakan o widespread ang korapsyon sa pamahalaan at bahagi na ito ng normal na kalakaran sa politika.

Batay sa resulta ng Nationwide Survey on Corruption ng Pulse Asia, sa 97% na nagsabi ng “widespread” ang korapsyon, 78% ang “very widespread”, habang 20% ang “somewhat widespread”.

Nasa 2% naman ang walang sagot kung widespread o hindi at ang nalalabing percentage ay not widespread.

Sa ginawang tanong sa mga respondents kung masasabi nilang “Corruption is a normal part of politics in our country,” nasa 59% ay agree, 31% “strongly agree” at 28% “somewhat agree”.

Malaki rin ang paniwala ng maraming Pinoy na tumitindi pa ang korapsyon o 85%; 12% ay “the same” at 3% “actually decreased”.

Ayon pa sa survey, nasa 98% ng mga Pinoy sa income class ABC at class E ang naniniwalang laganap ang korapsyon sa gobyerno habang 97% sa class D.

Nasa 100% naman ng mga Pinoy mula sa Visayas ang nagsabing widespread ang ­government corruption, habang 95% ang naitala sa Metro Manila, 96% sa Balance Luzon at 98% sa Mindanao.

Sa nasabi ring survey, majority ng mga Pinoy ang nagsabi na ang media ang pinaka-pinagkakatiwalaan nila o ‘most trustworthy’ upang tugunan ang korapsyon sa flood control projects na nasa 51%.

Sinundan ito ng civil society organizations na nasa 50%, Office of the Ombudsman na nasa 39%, Senado - 37%, Pang. Ferdinand Marcos Jr. - 32%, at House - 25%.

Ang Independent Commission for Infrastructure (ICI) naman na itinatag ni Pang. Marcos upang mag-imbestiga sa maano­malyang government projects ay nakakuha lamang ng 23% trustworthiness rating, habang ang Department of Public Works and Highways (DPWH) ay 7%.

Ang naturang non-commissioned survey ng Pulse Asia, na nilahukan ng 1,200 adults na isinailalim sa face-to-face interviews, ay isinagawa mula Setyembre 27 hanggang 30, 2025.

Ito ay sa panahong nagsasagawa ang administrasyong Marcos Jr. ng crackdown at congressional investigations hinggil sa maanomal­yang flood control projects sa bansa.