OVP spox: ‘Di ako konektado kay Atong Ang

MANILA, Philippines — Nilinaw kahapon ng bagong spokesperson ng Office of the Vice President (OVP) na si Ruth Castelo na hindi na siya konektado sa negosyanteng si Charlie “Atong” Ang.

Ayon kay Castelo, 2007 pa nang maging kliyente niya si Ang dahil sa kasong plunder.

Gayunman, natapos aniya ang kanilang client-to-lawyer relationship nang makalabas na si Ang sa detention facility sa Bicutan noong 2009.

Ipinaliwanag pa ni Castelo na sa ngayon ay nananatili silang magkaibigan ni Ang ngunit wala umano siyang kinalaman sa anumang mga aktibidad nito.

Matatandaang si Ang ang itinuturong umano’y utak sa pagkawala ng mga sabungeros, na sinasabing itinapon sa Taal Lake.