Lakers mikulata sa okc Thunder

CEBU, Philippines — Si Luka Doncic mipabuto og 30 puntos sa dihang ang Los Angeles Lakers milampaso sa Western Conference top seed Oklahoma City Thunder,126-99, sa NBA kagahapong adlawa didto sa Paycom Center sa OKC.

Hait kaayo ang tirada sa Lakers gikan sa pagsugod diin sila mibomba og franchise record nga 15 ka 3-pointers sa first half aron pagestablisar og 78-56 nga bentaha.

Wala na nila paginhawaa pa sukad niadto ang Thunder.

Sa kinatibuk-an, ang Lakers milansang og 22 ka tres, lima niini gikan ni Doncic.

Si Austin Reaves miposa og upat ka tres sa iyang 20 puntos samtang si LeBron James midugang og 19 puntos alang sa Lakers, nga mipaduol sa ilang tinguha nga moderetso og sud sa West playoffs.

Unom ka teams ang nagbugno alang sa nahibiling upat ka awtomatik nga luna sa West playoffs, gikan sa Lakers (48-30) nga anaa sa ikatulong puwesto ngadto sa Memphis Grizzlies (46-32) nga nahimutang sa ikawalong dapit.

Si Shai Gilgeous-Alexander mikadlit og 26 puntos alang sa Thunder, nga bisa'g nauwawan atubangan sa ilang fans segurado nang sud sa sunod nga hugna sa torneyo isip numero unong koponan sa ilang komperensiya.

Didto sa San Francisco, ang Houston Rockets mipakgang sa lima ka sunod-sunod nga daog sa Golden State Warriors, 106-96.

Sa laing aksiyon, ang tsansa sa Cleveland Cavaliers nga silyohan ang nag-unang dapit sa East nadiskaril human sila giparotan sa Sacramento Kings, 120-113, didto sa ilang korte. Ang Kings, nga ika-10 sa West ug padayong nangindahay nga makaapil sa play-in tournament, misakmit og bililhon nga daog kortesiya nilang Zach LaVine, DeMar DeRozan ug Domantas Sabonis nga nagkumbinar og 92 puntos.

Gawas niini, ang kadaogan sa Kings nagpasabot nga ang Portland Trail Blazers ug San Antonio Spurs natagak na sa West.

Samtang ang Boston Celtics mibuhi sa nipis nilang paglaum nga ilogon ang No.1 seed sa East gikan sa Cavs human ilang gilampornas ang Washington Wizards, 124-90.